वीरगञ्ज। बाराको परवानीपुर गाउँपालिका–५ बहुअरीमा सडक निर्माणमा भइरहेको अवरोधप्रति गाउँपालिकाले गम्भीर आपत्ति जनाएको छ। केही व्यक्तिहरूले राजनीतिक र व्यक्तिगत स्वार्थका कारण निर्माण कार्यमा अवरोध पुर्याउँदै भ्रामक सूचना फैलाएको गाउँपालिकाको आरोप छ।
गाउँपालिकाका प्रवक्ता महमद नुरुल होदा अन्सारीले एक प्रेस विज्ञप्ति जारी गर्दै विगत केही दिनदेखि नियोजित ढंगले सडक निर्माणमा बाधा पुर्याइएको उल्लेख गरेका छन्। उनका अनुसार, गाउँपालिकाले विगत तीन वर्षदेखि बहुअरीको मूल सडक निर्माणका लागि योजना र बजेट विनियोजन गर्दै आएको छ।
वडास्तरको निर्णयदेखि गाउँ सभासम्मको सहमति अनुसार चालु आर्थिक वर्षमा सडक निर्माण सुरु गरिएको हो। २०८० माघ २० गते वडा नम्बर ५ का अध्यक्ष रामेश्वर प्रसाद कलवारको अध्यक्षतामा स्थानीय पञ्च, भद्रभलादमी र बुद्धिजीवीहरूको बैठकले सडकको चौडाइ २५ फिट ९दायाँ–बायाँ १२।५–१२।५ फिट० हुने निर्णय गरेको थियो।
निर्णयअनुसार घर, टहरा, झोपडी हटाउन तीनपटक सार्वजनिक सूचना जारी गरिएको भए पनि २०८१ असार ४ गते केही स्थानीयले २१ फिट चौडाइको माग गर्दै न्यायिक समितिमा निवेदन दिएका थिए। त्यसपछि २३ फिट चौडाइमा सडक र नाला निर्माण गर्ने निर्णय गरिए पनि पुनः अवरोध गरिएको गाउँपालिकाको भनाइ छ।
२०७९ सालदेखि नै चलिरहेको यो विवाद समाधानका लागि विभिन्न चरणमा छलफल र सहमति प्रयास भए तापनि अवरोध कायमै रहेको छ। अन्ततः २०८२ सालमा यथास्थितिमा ९औसत १९–२१ फिट चौडाइ० सडक निर्माण गर्ने निर्णय भएको र यसमा गाउँसभा समेतको सर्वसम्मति प्राप्त भएको गाउँपालिकाले स्पष्ट पारेको छ।
गाउँपालिकाको तथ्याङ्कअनुसार, यदि २५ फिट चौडाइको सडक बनाइएमा झण्डै १०० घर र पर्खाल प्रभावित हुनेछन्, भने २३ फिटमा ९७ र २१ फिटमा ८८ घर–पर्खाल भत्काउनुपर्ने हुन्छ। निजी जग्गाको मुआब्जा र सहमति नपाएकाले व्यवहारिक रूपमा यथास्थितिमा सडक बनाउने अन्तिम निर्णय भएको जनाइएको छ।
गाउँपालिकाले बहुअरीमा हाइवे रोडको सुविधा भएकोले वर्तमान चौडाइमै सडक निर्माण उपयुक्त रहेको ठहर गर्दै, निर्माणमा अवरोध पुर्याउने कार्य तत्काल बन्द गर्न आग्रह गरेको छ। साथै, छलफलमार्फत समाधान निकाल्दै विकास निर्माणको काम अघि बढाउन सबै पक्षलाई सहयोग गर्न अपिल गरिएको छ।
प्रवक्ता अन्सारीले कानुनी प्रक्रिया पूरा गरी नियमअनुसार सडक निर्माण कार्य अघि बढाइने प्रतिबद्धता जनाएका छन्।
