झापा, ८ मङ्सिर । नेपाल सरकारका खानेपानी मन्त्री प्रदीप यादवले झापा जिल्लाका विभिन्न स्थानहरूमा निर्माणाधीन खानेपानी परियोजनाहरूको स्थलगत अनुगमन गर्दै, निर्माण कार्यको प्रगतिसँगै आइपर्ने चुनौतीहरूको विस्तृत जानकारी लिनुभएको छ ।
मन्त्री यादवले शनिवार झापाको मेचीनगर र धुलावारीमा निर्माणाधीन खानेपानी ओभरहेड ट्याङ्कीहरूको निरीक्षण गर्दै सम्बन्धित निकायहरूलाई निर्माण कार्य समयमै सम्पन्न गर्न कडा निर्देशन दिनुभयो । उहाँले उपभोक्ताहरूलाई शुद्ध र स्वच्छ पानी उपलब्ध गराउनका लागि निर्माण कार्यमा तीव्रता ल्याउन जोड दिनुभयो ।
त्यस्तै सुरुङ्गास्थित सुरुङ्गा खानेपानी तथा सरसफाइ उपभोक्ता संस्था र मोरङको सनिचरीस्थित पथरी खानेपानी उपभोक्ता तथा सरसफाइ संस्थाका पदाधिकारीहरूसँग छलफल गर्दै मन्त्री यादवले स्थानीय स्तरमा भइरहेको प्रगति, सञ्चालनमा रहेका योजना, र चुनौतीहरूको समाधानका लागि सरकारको निरन्तर सहयोगको प्रतिबद्धता व्यक्त गर्नुभयो ।
उहाँले भन्नुभयो, “सबै नागरिकको पहुँचमा गुणस्तरीय खानेपानी सेवा पुर्याउनु सरकारको प्रमुख दायित्व हो । यसका लागि सरकार आवश्यक नीति र कार्यक्रममार्फत सुविधायुक्त र दिगो सेवा उपलब्ध गराउन प्रयासरत छ ।”
मन्त्री यादवले झापाको मेचीनगरमा चारआली साना सहरी खानेपानी तथा सरसफाइ उपभोक्ता संस्था र काँकरभीट्टास्थित काँकरभीट्टा खानेपानी उपभोक्ता संस्थाको पनि स्थलगत अवलोकन गर्नुभयो । उहाँले स्थानीय तहमा भएका सकारात्मक कार्यहरूको प्रशंसा गर्दै खानेपानी आपूर्ति सुधारमा देखिएका चुनौतीहरू समाधान गर्न सहकार्यलाई प्राथमिकता दिनुपर्नेमा जोड दिनुभयो ।
मन्त्री यादवले झापामा निर्माण भइरहेको दिसाजन्य लेदो व्यवस्थापन परियोजना र सरसफाइ व्यवस्थापन परियोजनाको पनि अवलोकन गर्नुभयो । उहाँका अनुसार, परियोजनाहरूले झापा र आसपासका क्षेत्रका नागरिकहरूलाई स्वच्छता र स्वास्थ्य सुधारमा महत्त्वपूर्ण योगदान पुर्याउनेछन् ।
उहाँले देशभर देखिएका खानेपानी सम्बन्धी समस्या समाधानका लागि सरकार सक्रिय रहेको र व्यक्तिगत रूपमा स्थलगत अनुगमन तथा अवलोकनमार्फत परियोजनाको प्रगतिबारे जानकारी लिन आफू कटिबद्ध रहेको बताउनुभयो । मन्त्री यादवले दीर्घकालीन योजना कार्यान्वयन गर्दै स्थायी, भरपर्दो र सहज पानी आपूर्ति सुनिश्चित गर्न सबै तहका साझेदारहरूसँग सहकार्यलाई सुदृढ गर्ने धारणा राख्नुभयो ।
उहाँले भन्नुभयो, “नेपाल सरकार नागरिकहरूको जीवनस्तर उकास्न खानेपानी र सरसफाइ सेवा सुधार्न दृढ छ । स्रोत साधन परिचालन गरी समयमै परियोजनाहरू सम्पन्न गर्न हामी प्रतिबद्ध छौँ ।”
झापाका उपभोक्ता संस्थाहरूका पदाधिकारीहरूले मन्त्री यादवको सक्रियतालाई सकारात्मक कदमका रूपमा व्याख्या गर्नुभएको छ । यसले झापामा निर्माणाधीन खानेपानी परियोजनाहरूलाई समयमै सम्पन्न गर्न ऊर्जा थपेको छ ।
मन्त्री यादवको भ्रमण पश्चात् स्थानीय नागरिकहरूले स्थायी र गुणस्तरीय खानेपानी सेवा प्राप्त हुने आशा व्यक्त गर्नुभएको छ । मन्त्री यादवको सक्रिय नेतृत्वमा सरकारले खानेपानी समस्याको समाधान गर्दै नागरिकहरूको विश्वास जित्ने अपेक्षा गरिएको छ ।
