वीरगञ्ज, ६ चैत । पर्सा प्रहरीले प्रतिबन्धित लागूऔषध सहित एक जनालाई पक्राउ गरेको छ ।
ईनर्वा प्रहरी चौकीबाट खटिएको प्रहरी टोलीले वीरगञ्ज महानगरपालिकाको वडा नम्बर १५ भिष्वा निवासी २० बर्षिय बलजित यादवलाई पक्राउ गरेको हो ।
वीरगञ्ज महानगरपालिकाको वडा नम्बर १६ शंकराचार्य गेटस्थित सडकखण्डमा शनिबार राति साढे ९ बजेको समयमा भारत रक्सौलबाट वीरगञ्ज तर्फ आउँदै गरेको वीमनपा १ ह १-०११८ नम्बरको ई-रिक्सा चेकजाँच गर्दा लागूऔषध ओनरेक्स १०० एमएल लेखीएको सिरफ ५ कार्टुनमा १७८ बोतल फेला परेको प्रहरीले जनाएको छ ।
यादवले ई-रिक्साको सिट मुनी लुकाइ छिपाइ ल्याएको प्रतिबन्धित लागूऔषध फेला परेपछि नियन्त्रणमा लिइएको जिल्ला प्रहरी कार्यालय पर्साले जनाएको छ।
फेला परेको लागूऔषध ओनरेक्स, ई-रिक्सा र चालक यादव समेतलाई नियन्त्रणमा लिइएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक गिरीले बताए । यादवलाई लागूऔषध सम्बन्धी कसुरमा आइतबार पर्सा जिल्ला अदालतबाट ७ दिन म्याद थप गरी थप अनुसन्धान कार्य भइरहेको प्रवक्ता गिरीले जानकारी दिए ।
