वीरगञ्ज,२० असोज । पर्सागढी नगरपालिकाका नगर प्रमुख गोकर्ण पाठकले शिक्षा र स्वास्थ्यमा आफू निर्वाचित भएपछि निकै सुधार आएको दाबी गरेका छन् । उनले पर्सागढी नपामा ३० वटा सामुदायिक विद्यालय रहेकामा चारवटा मावि र २६ वटा आधारभूत विद्यालय तथा एउटा क्याम्पस रहेको बताए ।
उनले जनताको चन्दा, सहयोगबाट वडा नं ३ बडनिहारमा आमोदेवी क्याम्पस सञ्चालनमा रहेको र त्यहाँ नपाले सक्दो सहयोग गरेको बताए । विद्यालयहरूको हकमा अहिले शिक्ष्Fक अभावमा पठनपाठन प्रभावित नभएको र त्यसका लागि आफूले एक वर्षमा ४६ जना शिक्षकलाई स्वयंसेवक, सङ्घीय अनुदान र आन्तरिक स्रोतमा बहाल गरेको बताए । उनले यसअघि सामुदायिक विद्यालयहरूमा दरबन्दी, राहत, स्वयंसेवक र आन्तरिक स्रोतका शिक्षकहरू खट्दै आएका र उनीहरूको सङ्ख्या पर्याप्त नरहेका कारण आफू निर्वाचित भएको एक वर्षमा ४६ जना शिक्ष्Fक राखेर पठनपाठनको समस्या समाधान गरेको बताए ।
अहिले शिक्षक अभावमा पर्सागढीका सामुदायिक विद्यालयहरूमा पठनपाठन प्रभावित नभएको बताए । यसैगरी, नपामा पाँचवटा स्वास्थ्य संस्था र चारवटा आधारभूत स्वास्थ्य रहेको र त्यसको उचित व्यवस्थापन हुँदै आएको उनले बताए । उनले नगरवासीहरूको स्वास्थ्यलाई ध्यानमा राखेर आवश्यक रगत निश्शुल्क पाउने व्यवस्था गरेको र सो प्रयोजनको लागि रेडक्रससँग सम्झौता भएको उनले बताए । नगर अस्पताल निर्माण प्रक्रिया अघि बढाइएको, तत्काल घुम्ती भिडियो एक्स–रे सेवा सञ्चालनमा ल्याएको र प्रयोगशालालाई पनि व्यवस्थित गरिएको उनले बताए । पर्सागढी नपाले शिक्षा स्वास्थ्यलाई प्राथमिकतामा राखेको र त्यसको अलावा पर्यटन, भौतिक संरचना निर्माणमा पनि काम गर्दै आएको नगरप्रमुख पाठकले बताए ।
ऐतिहासिक, धार्मिक, पर्यटकीय क्षेत्र कोइलाभार, आमोदेवीलगायत तीनवटा पर्यटन क्षेत्रमा नगरपालिकाले काम गर्दै आएको बताए । उनले पाँचवटा कल्भर्ट निर्माण कार्य भइरहेको, दुईवटा चालू भइसकेको, एउटा उद्घाटनको पर्खाइमा रहेको र दुईवटा टेन्डरबाट निर्माण प्रक्रियामा रहेको बताए । नगरप्रमुख पाठकले नगरका नौवटा वडामध्ये छ ठाउँमा कालोपत्र सडक निर्माण भइरहेको बताए । सातवटा विद्यालयको भवन निर्माणाधीन रहेको उनले बताए । सभार : शोध खबर
