वीरगञ्ज । वीरगञ्ज महानगरपालिका वडा नम्बर १६ नगवामा फेरि एक युवकको शव फेला परेको छ । नगवाको नयाँ बस्ती घर भएका ३० वर्षीय नजिम मियाँको शव बुधवार बिहान फेला परेको हो ।
नगवाको बाइपास रोड नजिकै रहेको नेपाल खानेपानी संस्थानको पश्चिमतर्फको सडक छेउमा मियाँको शव फेला परेको इलाका प्रहरी कार्यालय नगवाका प्रहरी नायब निरीक्षक दीपेन्द्र मल्लले जानकारी दिए ।
सडक छेउमा बुधवार बिहान करिब साढे ७ बजे शव देखेपछि स्थानीयले प्रहरीलाई खबर गरेका थिए ।
प्रहरी नायब निरीक्षक मल्लका अनुसार मादक पदार्थ सेवन गरेका मियाँ आफैँ लडेर उनको मृत्यु भएको हुन सक्ने अनुमान छ ।
मृतकको शव पोस्टमार्टमको लागि नारायणी अस्पतालमा पठाइएको र शवको पोस्टमार्टम रिपोर्ट आएपछि मात्रै मृत्युको यकिन कारण खुल्ने प्रहरी नायब निरीक्षक मल्लले बताए ।
तिन दिन अघि पनि नगवामै एक युवक मृत अवस्थामा फेला परेका थिए ।
