काठमाडौँ । अब सवारी चालक अनुमतिपत्र (लाइसेन्स)को राजस्व भुक्तानी अनलाइनबाटै गर्न मिल्ने भएको छ । पहिलो पटक परीक्षणका रुपमा गण्डकी प्रदेशले यो सेवाको सुरुवात गरेको छ । बुधबार भौतिक पूर्वाधार तथा यातायातमन्त्री प्रकाश ज्वालाले उक्त अनलाइन सेवाको सुरुवात गरेका हुन् ।
उनले यातायात व्यवस्था कार्यालयमा ठूला लाइन र बिचौलियामुक्त गर्ने उद्देश्यले उक्त अनलाइन सेवा सुरु गरेको बताए । साविककै प्रणालीमा सुधार गरी यातायात व्यवस्था विभागले अनलाइनबाटै राजस्व भुक्तानी गर्न मिल्ने व्यवस्था गरेको हो । विभागका अनुसार लिखित र ट्रायल परीक्षामा पास भएकाले अनलाइनबाटै राजस्व तिर्न सक्ने छन् । यो प्रणाली पूर्ण रुपमा लागू भएपछि कनेक्ट आईपीएस, ईसेवा, खल्तीजस्ता गेटवेमार्फत लाइसेन्सको राजस्व भुक्तानी गर्न मिल्ने विभागले जनाएको छ ।
अहिले सवारी चालक अनुमति पत्रका लागि दैनिक ६ देखि ७ हजारले आवेदन दिने गरेका छन् । त्यसका लागि राजस्व बुझाउनदेखि स्वास्थ्य परिक्षण गर्नसम्म सेवाग्राही लाइनमा बस्नुपर्ने बाध्यता छ । लाइन बस्नुपर्ने बाध्यता हटाउँदै सेवाग्राहीलाई घरमै सेवा उपलब्ध गराउनेगरी अनलाइन सेवा सुरु गरिएको विभागका महानिर्देशक नारायणप्रसाद भट्टराईले बताए । ‘अहिले गण्डकी प्रदेशमा परीक्षणका रुपमा यो सेवा सुरु गरिएको हो,’ उनले भने, ‘यसलाई १५/२० दिन हेरिने छ, त्यसपछिको एक महिनाभित्र सबै यातायात व्यवस्था कार्यालयहरुबाट सेवा सुरु गरिने छ ।’
लिखित परीक्षा दिन, बायोमेट्रिक गर्न र ट्रायल दिन मात्रै यातायात कार्यालयमा भौतिक रूपमा उपस्थित भए पुग्ने महानिर्देशक भट्टराईको भनाइ छ । अनलाइनबाट राजस्व भुक्तानीको सेवा सुरु गरेपछि सेवाग्राहीलाई सहज हुने अनुमान गरिएको गण्डकी प्रदेश अन्तर्गत भौतिक पूर्वाधार विकास तथा यातायात व्यवस्था मन्त्री रेशमबहादुर जुग्जालीले बताए ।
