२३ असोज, वीरगञ्ज
जनता समाजवादी पार्टी नेपालकी केन्द्रीय सदस्य करिमा बेगमले प्रदेश सभा सदस्यमा स्वतन्त्र उम्मेदवारी दिएकी छन् । पर्सा निर्वाचन क्षेत्र नम्बर २ को (ख) बाट बेगमले उम्मेदवारी दर्ता गराएकी हुन् । उनी राष्ट्रिय झण्डा ओढेर मनोनयन दर्ताका लागि निर्वाचन अधिकृतको कार्यालयमा पुगेकी थिईन् ।
उनी वि.स.२०६४ को पहिलो संविधानसभा निर्वाचनमा पर्सा क्षेत्र नम्बर १ बाट संविधानसभा सदस्यमा प्रत्यक्ष निर्वाचित भएकी थिईन् । भने वि.स. २०७४ को निर्वाचनमा समानुपातिक तर्फबाट तत्कालिन संघीय समाजवादी फोरम नेपालले प्रदेशसभा सदस्यमा चुनेको थियो ।
मंसिर ४ गते हुने निर्वाचनका लागि पार्टीको जिल्ला समन्वय समितिले बेगमको नाम पर्सा क्षेत्र नम्बर २ को प्रतिनिधिसभा सदस्यका लागि सिफारिस गरेको थियो । जसपा एमाले गठबन्धन हुँदा यो क्षेत्रमा जसपाकै नेता अधिवक्ता सुरेन्द्र कुर्मीले टिकट पाएका छन् ।
त्यसबाट असन्तुष्टी जनाउँदै वेगमले प्रदेश सभा सदस्यका लागि उम्मेदवारी दर्ता गराएकी हुन् । प्रदेशसभा सदस्यमा उम्मेदवारी दर्ता पछि सञ्चारकर्मीलाई प्रतिक्रिया दिदै बेगमले मधेसी मुस्लिमको छातीमा गोली हान्ने एमालेलाई साथ दिन पार्टी गएकोले त्यसको विरुद्धमा उभिएको बताईन् ।
‘जुन एमालेले मेधेसी मुस्लिमहरुलाई छातीमा गोली हानेर हत्या ग¥यो । अहिलेपनि हामीले अधिकार पाएको छैन । जहाँ थियौ त्यहि छौं ।’ उनले भनिन् ‘ एमालेको नेतृत्वमा सरकार हुँदा पनि मधेसी जनताका लागि केहि गरेन । चोरको साथ दिएपछि चोर नै भईन्छ नी, त्यसैले पार्टीको यो कदममा साथ दिन सकिन ।’
०७२ असोज ३ गते संविधा जारी भएको दिन मधेस आन्दोलनका क्रममा आफू घाईते भएको बताउँदै उनले जनताले आफूप्रति गरेको अपेक्षा पुरा गर्न चुनावी मैदानमा उत्रिएको बताईन् ।
‘बन्धनबाट बाहिर निस्केको छु, स्वतन्त्र भएको छु, जनताका लागि आवाज उठाउन सक्छु, देश र प्रदेशमा भएका गलत गतिविधिको खुलेर विरोध गर्न सक्छु । ’ उनले भनिन् ‘ पहिला सरकारमा भएका कारण मेरो मुखमा टेप टाँसिएको थियो, हात बाँधिएको थियो । थुप्रै कुराहरु हाउसमा बोल्न चाहेर पनि बोल्न सकिन । किनभने शुरुदेखि नै प्रदेशमा हाम्रो सरकार थियो ।’
मुख्यमन्त्री लालबाबु राउतले आफ्नो क्षेत्रको, जन्मथलो जगरनाथपुरको विकासलाई मात्रै प्राथमिकतामा राखेकोले सरकारमा बसेर पनि आफूले सोचे जस्तो विकासको काम गर्न नसकेको बताईन् ।
© 2024
