वीरगञ्ज। जिल्लावासीले दैनिक जीवनमा भोग्दै आएका विभिन्न समस्याको तत्काल समाधान गर्न नेपाली कम्युनिस्ट पार्टी पर्साले सरकारसँग माग गरेको छ। पार्टीले मंगलबार जिल्ला प्रशासन कार्यालय पर्सामार्फत प्रधानमन्त्री तथा मन्त्रिपरिषद्को कार्यालयलाई ज्ञापनपत्र पठाउँदै जनजीविकासँग प्रत्यक्ष जोडिएका विषयमा सरकारको ध्यानाकर्षण गराएको हो।
जिल्ला संयोजक जयप्रकाश थारूको नेतृत्वमा पुगेको टोलीले सहायक प्रमुख जिल्ला अधिकारी कृष्णजंग थापालाई ज्ञापनपत्र बुझाएको थियो। ज्ञापनपत्रमा कृषि, खाद्यान्न, विद्युत्, स्वास्थ्य, ग्यास तथा सरकारी सेवासँग सम्बन्धित समस्या तत्काल सम्बोधन गर्न माग गरिएको छ।
किसानलाई सस्तो र सहज रूपमा रासायनिक मल, बीउबिजन, सिँचाइ तथा आवश्यक कृषि सामग्री उपलब्ध गराउनुपर्ने पार्टीको माग छ। कृषि क्षेत्रलाई राज्यको प्राथमिकतामा राख्दै मलखादमा हुने कालोबजारी नियन्त्रण गर्नसमेत आग्रह गरिएको छ।
त्यसैगरी दैनिक उपभोग्य वस्तुमा हुने कृत्रिम अभाव, कालोबजारी र अस्वाभाविक मूल्यवृद्धि रोक्न प्रभावकारी बजार अनुगमन गरी दोषीमाथि कारबाही गर्न सरकारसँग माग गरिएको छ।
पार्टीले विद्युत् सेवा नियमित र भरपर्दो बनाउन, अघोषित विद्युत् कटौती अन्त्य गर्न, प्राविधिक समस्या समाधान गर्न तथा विद्युत् महसुल घटाउनसमेत ध्यानाकर्षण गराएको छ।
स्वास्थ्य सेवासम्बन्धी मागमा सरकारी अस्पतालमा रेबिजविरुद्धको खोप र सर्पदंशको एन्टिभेनम पर्याप्त मात्रामा उपलब्ध गराउन तथा स्वास्थ्य बीमा कार्यक्रमलाई प्रभावकारी बनाउनुपर्ने विषय समेटिएको छ।
ज्ञापनपत्रमा एलपी ग्यासको सहज आपूर्ति सुनिश्चित गर्न, सरकारी कार्यालयमा हुने ढिलासुस्ती हटाउन र जन्मदर्तादेखि मृत्युदर्तासम्मका प्रमाणपत्रमा लाग्ने शुल्क खारेज गर्नुपर्ने मागसमेत राखिएको छ।
ज्ञापनपत्र बुझ्दै सहायक प्रमुख जिल्ला अधिकारी थापाले पार्टीले उठाएका विषय सरकारसमक्ष पुर्याउने प्रतिबद्धता जनाएका छन्।
ज्ञापनपत्र बुझाउने टोलीमा जिल्ला इन्चार्ज पिएल श्रेष्ठ, सहइन्चार्ज मनोज चौधरी, केन्द्रीय सदस्य किशोरी कुशवाहा र हिरा भट्टराई, सहसंयोजकहरू गंगा खड्का, बाबुराम कौशिक र फिरोज बादशाह तथा मधेस प्रदेश कमिटी सदस्यहरूलगायतको सहभागिता रहेको थियो।
