वीरगञ्ज — वीरगञ्ज कलेजले नयाँ शैक्षिक सत्रका लागि विभिन्न विधामा आकर्षक छात्रवृत्ति कार्यक्रम सार्वजनिक गरेको छ। कलेजले शैक्षिक उत्कृष्टता, खेलकुद तथा सामाजिक समावेशितालाई प्राथमिकता दिँदै छात्रवृत्ति योजना ल्याएको जनाएको छ।
कलेजका अनुसार प्रवेश परीक्षामा प्रथम हुने विद्यार्थीलाई भर्ना शुल्कमा शतप्रतिशत छात्रवृत्ति प्रदान गरिनेछ भने दोस्रो र तेस्रो स्थान हासिल गर्ने विद्यार्थीलाई क्रमशः पुस्तकालय शुल्क तथा मर्मत–विकास शुल्कमा सहुलियत दिइनेछ।
त्यसैगरी टर्मिनल परीक्षामा उत्कृष्ट हुने विद्यार्थीलाई गिफ्ट ह्याम्पर तथा अन्तिम परीक्षामा प्रथम, द्वितीय र तृतीय हुनेलाई क्रमशः ५ हजार, ३ हजार र २ हजार रुपैयाँ नगद पुरस्कार प्रदान गरिने व्यवस्था गरिएको छ।
कलेजले संस्थापक निर्देशक स्वर्गीय शोभा गुप्ता स्मृति छात्रवृत्ति अन्तर्गत बीबीएस चौथो वर्षका टपर विद्यार्थीलाई ५ हजार १ सय रुपैयाँ नगद पुरस्कार दिने जनाएको छ।
खेलकुदतर्फ क्रिकेट र फुटबलका प्रदेश तथा राष्ट्रिय स्तरका खेलाडीलाई शतप्रतिशत छात्रवृत्ति तथा जिल्ला, प्याब्सन र एन–प्याब्सन स्तरका खेलाडीलाई ५० प्रतिशत छात्रवृत्ति उपलब्ध गराइनेछ।
एसईईमा ३.६१ वा सोभन्दा बढी जीपीए ल्याउने विद्यार्थीलाई मासिक शुल्कमा शतप्रतिशत छुट तथा ३.४१ देखि ३.६० जीपीए ल्याउनेलाई ५० प्रतिशत छुटको व्यवस्था गरिएको कलेजले जनाएको छ। शिक्षकका सन्तानलाई २५ प्रतिशत मासिक शुल्क छुट दिइनेछ।
यसैगरी वीरगञ्ज महानगरपालिकाका विद्यार्थीका लागि शिक्षा ऐन तथा नियमअनुसार कुल विद्यार्थी संख्याको १० प्रतिशतलाई छात्रवृत्ति उपलब्ध गराइने कलेज प्रशासनले जनाएको छ।
