वीरगञ्ज — पर्सा जिल्ला प्रशासन कार्यालयले जिल्लाभरका सबै सरकारी कार्यालयलाई बिचौलिया मुक्त, छिटो, सरल र सहज सेवा उपलब्ध गराउन निर्देशन दिएको छ।
आइतबार जारी विज्ञप्तिमा प्रशासनले सरकारी सेवामा बिचौलियाको दुरुपयोग रोक्न फरमान जारी गरेको हो। प्रशासनका अनुसार, सेवाग्राहीलाई सहयोग वा सहजीकरण गर्ने नाममा रकम असुल्ने जो कोही पनि कानुन बमोजिम कडा कारबाहीको दायरामा पर्नेछन्।
प्रशासकीय अधिकृत रेखा कुमारीले हाल प्रशासन कार्यालयबाट प्रदान हुने सेवाहरू नियमित रूपमा सहज र व्यवस्थित रूपमा सञ्चालन भइरहेको जानकारी दिइन्। उनले बिचौलियालाई लक्षित गर्दै कार्यालय परिसरभित्र मात्र नभएर वरिपरि पनि यस्ता गतिविधि नगर्न चेतावनी दिएकी छन्।
कुमारीले भनिन्, “प्रशासनको निर्देशन विपरीत कार्य भएको पाएमा निगरानी बढाएर तत्काल आवश्यक कारबाही गरिनेछ। यस कार्यालय तथा जिल्लास्थित कुनै पनि कार्यालय वरिपरि सेवाग्राहीलाई सहयोग तथा सहजीकरण गर्ने नाममा गैरकानुनी रकम असुल्ने कार्यमा संलग्न जो कोहीलाई पनि कानुन बमोजिम कडा कारबाही गरिनेछ।”
प्रशासनको यस कदमले सरकारी सेवामा पारदर्शिता बढाउने र सेवाग्राहीले सहज र सुरक्षित रूपमा सेवा लिन सक्ने वातावरण सिर्जना गर्ने अपेक्षा गरिएको छ।
