बिरगञ्ज — क्वाइनोनिया बिरगंज चर्चले बिरगञ्ज–१६, मिथिलानगरमा “रक्तदान नै जीवनदान हो” भन्ने नारासहित रक्तदान कार्यक्रम आयोजना गरेको छ। उक्त कार्यक्रममा २३ महिला सहित ७९ जनाले रक्तदान गरेका छन्।
चर्चले विगतमा देश तथा समाजमा रहेका कुप्रथाहरुको विरोध गर्दै जनचेतना फैलाउने कार्यक्रमहरू संचालन गर्दै आएको छ। आइतबारको रक्तदान कार्यक्रम पनि बिरगञ्ज रक्तसञ्चार केन्द्रमा रगतको अभावलाई मध्यनजर गर्दै आयोजना गरिएको थियो।
कार्यक्रममा बिरगञ्ज महानगर–१६ का वडाअध्यक्ष परशुराम चौरसियाले रक्तदानको महत्वबारे चर्चा गर्दै हरेक ३ महिनामा नियमित रक्तदान गर्न सबैलाई आग्रह गरे। नेपाल रेडक्रस सोसाइटी पर्साका सभापति बृजकिशोर पटेलले भने, “रगत अभावका कारण बिरामीहरूको उपचारमा समस्या भइरहेको छ। रक्तदाता र आयोजक परिवारप्रति हार्दिक आभार व्यक्त गर्दछु।”
कार्यक्रमका अन्य अतिथिहरूमा शिक्षाविद् मार्टिन मोक्तान, बिरगञ्ज कपडा बैंकका अध्यक्ष लालबाबु सिंह, राष्ट्रिय सम्पदा संरक्षण अभियानका संयोजक जफर अन्सारी, पर्सा ख्रीस्टियन समाजका अध्यक्ष पाष्टर सिमोन राई, साथै चर्चका पदाधिकारी, स्थानीय अग्रज, महिला र युवाहरूको सहभागिता रहेको थियो।
चर्चका पाष्टर राजकुमार घोमिरेले उपस्थित सबै रक्तदाता र सहयोगीलाई धन्यवाद व्यक्त गर्दै भने, “रक्तदानले मानवता बलियो बनाउँछ र यसले जीवनदानको महत्वलाई अझ सजीव बनाउँछ। हरेक नागरिकले यसमा सहभागिता जनाउनुपर्छ।”
कार्यक्रमले बिरगञ्जमा जनचेतना र समुदायको सहकार्यका माध्यमबाट स्वास्थ्य सेवामा योगदान पुर्याउने महत्वलाई पुनः पुष्टि गरेको छ।
