वीरगञ्ज — पवित्र राम नवमी को अवसरमा “हाम्रो टोलबासी” नामक स्थानीय संस्थाद्वारा एक प्रशंसनीय सामाजिक कार्य सम्पन्न गरिएको छ। संस्थाले दीर्घकालदेखि शारीरिक समस्याबाट पीडित एक व्यक्तिलाई आत्मनिर्भर बनाउने उद्देश्यले गुम्टी निर्माण गरी हस्तान्तरण गरेको हो।
संस्थाका अनुसार किशमोहन पासवान, जो लामो समयदेखि दुवै खुट्टामा समस्या (bilateral lower limb deformity/GBS) का कारण दैनिक जीवनयापनमा कठिनाइ भोग्दै आउनु भएको थियो, उहाँको जीविकोपार्जन सहज बनाउन उक्त पहल गरिएको हो। गुम्टीसँगै आवश्यक किराना सामग्री समेत उपलब्ध गराइएको छ, जसले उहाँलाई सानो व्यवसाय सञ्चालन गरी आत्मनिर्भर बन्न सहयोग पुग्ने अपेक्षा गरिएको छ।
आज आयोजित एक औपचारिक कार्यक्रममा उक्त गुम्टीको विधिवत उद्घाटन गरिएको थियो। कार्यक्रममा स्थानीय बासिन्दाहरूको उल्लेखनीय उपस्थिति रहेको थियो भने सहभागीहरूले संस्थाको यस कार्यको उच्च प्रशंसा गरेका थिए।
कार्यक्रम सफल बनाउन आर्थिक सहयोग पुर्याउनु हुने इन्जिनियर अफजल हुसैनप्रति संस्थाले विशेष आभार व्यक्त गरेको छ। साथै, संस्थाका अध्यक्ष दिव्यांशु कर्ण, सचिव सत्यम झा, उपाध्यक्ष स्वीकृति मिश्र, कोषाध्यक्ष अभिषेक ठाकुर, कार्यक्रम संयोजक प्रीति रौनियार, सह-कोषाध्यक्ष सुरज चौधरी, सह-सचिव आदित्य चौधरी तथा सदस्यहरू बेबी चौधरी, आरव राज सिंह, अर्नव सिंह, चन्दन जैसवाल लगायत सम्पूर्ण टिमको सक्रिय भूमिका रहेको जनाइएको छ।
संस्थाका अध्यक्ष दिव्यांशु कर्णले भविष्यमा पनि यस्ता मानवीय सेवा र सहयोगका कार्यक्रमलाई निरन्तरता दिइने बताउँदै समाजका आवश्यकता भएका व्यक्तिहरूलाई प्रत्यक्ष सहयोग पुर्याउने लक्ष्य रहेको उल्लेख गर्नुभयो।
