रौतहट
रौतहटको चन्द्रपुर नगर क्षेत्रमा स्वाइन फिभर रोगका कारण बङ्गुर मर्न थालेका छन्।
चन्द्रपुर नगरपालिका–५ राजपेडा गाउँका किसान हरि गुरोका १४ वटा बङ्गुर एक साताको अन्तरालमा मरेको पशु चिकित्सक डा. सुलभ चौधरीले जानकारी दिए।
किसान गुरोका अनुसार बङ्गुर बिरामी भएपछि पशु चिकित्सकलाई खबर गरेर उपचार गराए पनि बचाउन नसकिएको हो।
डा. चौधरीका अनुसार चन्द्रनिगाहपुर–४ मा शान्ति मगरको एउटा बङ्गुर पनि सोही रोगका कारण मरेको छ। यो रोग विशेषगरी संक्रमित बङ्गुर, त्यसका पाठापाठी, मासु वा संक्रमित पशुको सम्पर्कमा आएका अन्य पशुबाट फैलिने गर्दछ।
रोग नियन्त्रणका लागि चन्द्रपुर नगरपालिकाले सबै वडामा खोप अभियान सञ्चालन गर्ने घोषणा गरेको भए पनि हाल खोप अभाव रहेकाले अभियान सुरु गर्न केही समय लाग्ने डा. चौधरीले बताए।
चन्द्रपुर क्षेत्रमा किसानहरूले करिब छ हजारको हाराहारीमा बङ्गुर पालन गर्दै आएका छन्।
