कलैया । बाढीबाट प्रभावित बालबालिका तथा परिवारका लागि राहत सामग्री वितरण कार्यक्रम सोमबार महागढीमाई नगरपालिका–२, अच्युत प्राथमिक विद्यालयमा सम्पन्न भएको छ।
उक्त कार्यक्रममा सेभ द चिल्ड्रेनको आर्थिक सहयोग, जन जागरण युवा क्लब, बाराको सहजीकरण तथा महागढीमाई नगरपालिका, करैयामाई गाउँपालिका र देवताल गाउँपालिकाको सहकार्यमा ८७ घरधुरीलाई राहत सामग्री वितरण गरिएको हो।
राहत सामग्रीका विवरण
प्रत्येक प्रभावित परिवारलाई त्रिपाल, लामखुट्टे झुल सेट, सरसफाइ सामग्री सेट, भाँडाकुँडा सेट, डिग्निटी किट, र बेबी प्याक (०–२ वर्ष र ३–५ वर्ष समूहका लागि) वितरण गरिएको थियो।
संस्थाका अध्यक्ष भैयाराम यादवले राहत सामग्रीका प्रकार, लागत, वितरण मापदण्ड र उपयोगिताबारे सहभागीहरूलाई अभिमुखीकरण गराएका थिए।
प्रमुख अतिथिको भनाइ
कार्यक्रमको उद्घाटन महागढीमाई नगरपालिकाका मेयर उपेन्द्र यादवले एकजना प्रभावित परिवारलाई राहत हस्तान्तरण गरेर गर्नुभयो। उहाँले बाढी प्रभावित बालबालिका तथा परिवारहरूका लागि यस सहयोगले तत्काल राहत पुर्याउने विश्वास व्यक्त गर्नुभयो।
सहभागीहरूको उपस्थिति
कार्यक्रममा महागढीमाई–१ का वडाध्यक्ष मनोज कुमार गुप्ता, वडा नं. २ का वडाध्यक्ष विश्वनाथ कुशवाहा, वडा नं. ६ का गेनालाल यादव, सेभ द चिल्ड्रेनका कार्यक्रम प्रबन्धक चन्द्र साह, देवेन्द्र यादव, जन जागरण युवा क्लब, बाराका कृष्ण यादव, कौशल किशोर साह, नरेश साह, साथै पूर्व वडाध्यक्ष विरेन्द्र चौरसिया, वडा सदस्य मनोज यादव लगायत सुरक्षाकर्मी र स्थानीय बासिन्दाको उपस्थिति थियो।
व्यवस्थापन र सुरक्षाको व्यवस्था
कार्यक्रमलाई व्यवस्थित बनाउन महिला र पुरुषका छुट्टाछुट्टै लाइन, सुझाव पेटिका, र प्राथमिक उपचार बक्सको व्यवस्था गरिएको थियो।
संस्थाका कार्यकारी निर्देशक डा. श्रीनिवास बैठाले कार्यक्रम सफलतापूर्वक सम्पन्न भएको जानकारी दिनुभयो।
