सल्यान — सल्यानको कपुरकोट गाउँपालिका–३ चोरखोलामा आइतबार बिहान भएको सवारी दुर्घटनामा तीन जनाको मृत्यु भएको छ भने दुई जना गम्भीर घाइते भएका छन्।
जिल्ला प्रहरी कार्यालय सल्यानका अनुसार रुकुम पश्चिमबाट दाङतर्फ जाँदै गरेको लु २ ख ६५०२ नम्बरको फोर्स गाडी बिहान करिब ४ बजे राप्ती राजमार्गमा दुर्घटनाग्रस्त भई सडकबाट करिब ४०० मिटर तल खसेको हो।
दुर्घटनामा एक महिला र दुई पुरुषको घटनास्थलमै मृत्यु भएको प्रहरीले जनाएको छ। मृत्यु भएकाहरूको सनाखत हुन बाँकी छ।
घटनामा रुकुम पश्चिम बाफिकोट गाउँपालिका–५ निवासी अन्दाजी ४७ वर्षीय खगेन्द्र केसी र ३६ वर्षीया बिना केसी गम्भीर घाइते भएका छन्। दुवैको टाउको तथा शरीरका विभिन्न भागमा चोट लागेकाले राप्ती प्रादेशिक अस्पताल तुलसीपुरमा प्रारम्भिक उपचारपछि थप उपचारका लागि नेपालगञ्ज पठाइएको प्रहरीले जनाएको छ। उनीहरूको अवस्था गम्भीर रहेको बताइएको छ।
दुर्घटनाबारे थप अनुसन्धान भइरहेको जिल्ला प्रहरी कार्यालय सल्यानले जनाएको छ।
