रौतहट, असोज ४ – रौतहटमा प्रहरीले तरकारी बोक्ने गाडीबाट ठूलो मात्रामा लागुऔषध गाँजा बरामद गरेको छ। जिल्ला प्रहरी कार्यालय रौतहटका अनुसार, शनिबार राति इशनाथ नगरपालिका–८ स्थित मोतिपुर सडक खण्डबाट ३ सय ३४ किलो गाँजा बरामद गरिएको हो।
प्रहरी चौकी रामपुरखापबाट गस्तीमा खटिएको टोलीले भारततर्फ जाँदै गरेको प्रदेश ३–०१–०२२ च १८६१ नम्बरको पिकअप गाडीलाई चेकजाँच गर्दा उक्त गाँजा फेला परेको हो। गाडीमा काउली लोड गरिएको थियो र गाँजा त्यसैको भित्री भागमा लुकाइएको अवस्थामा फेला परेको प्रहरी प्रवक्ता तथा प्रहरी नायब उपरीक्षक (डीएसपी) राजु कार्कीले जानकारी दिए।
गस्तीमा रहेको प्रहरीलाई देखेपछि गाडी चालक गाडी छाडेर फरार भएका थिए। त्यसपछि शंका लागेर चेकजाँच गर्दा २६ वटा पोकामा राखिएको गरी ३३४ किलो गाँजा बरामद भएको हो।
प्रहरीले गाडी र गाँजा दुबैलाई नियन्त्रणमा लिएको छ भने फरार चालक तथा लागुऔषध तस्करको खोजी भइरहेको प्रहरी नायब उपरीक्षक कार्कीले बताएका छन्।
