वीरगञ्ज ।
बिरगंज पब्लिक कलेजमा शैक्षिक गुणस्तर सुनिश्चितता तथा प्रत्यायन (Educational Quality Assurance and Accreditation – EQAA) प्रक्रिया अन्तर्गत विश्वविद्यालय अनुदान आयोग (UGC) को प्रि-असेस्मेन्ट टोलीले आज औपचारिक भ्रमण सम्पन्न गरेको छ।
टोलीले कलेजको शैक्षिक कार्यक्रम, व्यवस्थापन, भौतिक संरचना, शैक्षिक वातावरण, प्रशासनिक पारदर्शिता, विद्यार्थी–शिक्षक–अभिभावक सहभागिता लगायतका पक्षहरूको अवलोकन गर्दै आवश्यक सुधारका सुझाव प्रदान गरेको छ।
यस अवसरमा कलेजका क्याम्पस प्रमुख डा. विनय श्रेष्ठले कलेजको विगतदेखि हालसम्मको प्रगति, उपलब्धि र भविष्यका योजनाबारे जानकारी गराए। टोलीका संयोजक प्रा. डा. लेखनाथ भट्टराई, सदस्य श्रीमती नबिना चौलागाईं, व्यवस्थापन समिति, शिक्षक तथा कर्मचारीहरूको उपस्थितिमा स्वागत कार्यक्रम सम्पन्न गरिएको थियो।
प्रि-असेस्मेन्ट टोलीले कलेजले गुणस्तरीय शिक्षाको निरन्तरता र राष्ट्रिय प्रत्यायन प्रक्रियामा देखाएको प्रतिबद्धता सराहनीय रहेको बताउँदै अझ प्राविधिक र प्रशासनिक पक्षलाई सुदृढ बनाउन सुझाव दिएको छ।
भ्रमणले कलेजलाई आगामी दिनमा शैक्षिक गुणस्तर र प्रत्यायन प्रक्रियालाई अझ सशक्त बनाउन प्रेरणा दिने विश्वास सहायक क्याम्पस प्रमुख डा. अरविन्द श्रेष्ठले व्यक्त गर्नुभयो।
