पर्सा– पर्सा जिल्लाको जगरनाथपुर गाउँपालिका र वीरगंजस्थित नेशनल मेडिकल कलेज तथा शिक्षण अस्पतालबीच गुणस्तरीय र सुलभ स्वास्थ्य सेवा प्रवाह गर्नेसम्बन्धी औपचारिक सम्झौता सम्पन्न भएको छ। सम्झौतापछि अब गाउँपालिकाका बासिन्दाहरूले नेशनल मेडिकल कलेजमा विभिन्न स्वास्थ्य सेवाहरूमा उल्लेखनीय छुट पाउने भएका छन्।
सम्झौतापत्रमा जगरनाथपुर गाउँपालिकातर्फबाट पालिका अध्यक्ष श्रीकान्त प्रसाद यादव र मेडिकल कलेजतर्फबाट प्रबन्ध निर्देशक सहनवाज अन्सारीले हस्ताक्षर गरेका हुन्।
के-केमा कति छुट ?
सम्झौता अनुसार जगरनाथपुर गाउँपालिकाका नागरिकहरूले नेशनल मेडिकल कलेजमा निम्न स्वास्थ्य सेवाहरूमा छुट पाउनेछन्:
ओपीडी टिकट: २५ प्रतिशत छुट
जेनरल बेड चार्ज: १५ प्रतिशत छुट
ICU, NICU, PICU बेड चार्ज: १६ प्रतिशत छुट
सर्जरी (मेजर/माइनर): ८ प्रतिशत छुट
प्याथोलोजी परीक्षण: १० प्रतिशत छुट
भिडियो एक्स–रे, एक्स–रे, ECG, एन्डोस्कोपी, TMT, CT Scan, MRI: ७ प्रतिशत छुट
फार्मेसी (औषधि): १० देखि १५ प्रतिशत छुट
दन्त सेवा: ७ प्रतिशत छुट
यस सुविधाले विशेषगरी आर्थिक रूपमा कमजोर वर्गका नागरिकहरूलाई ठूलो राहत दिने विश्वास गरिएको छ।
अध्यक्ष यादवको भनाइ
सम्झौतापछि गाउँपालिका अध्यक्ष श्रीकान्त यादवले भने, “हामी सबैका लागि सुलभ, गुणस्तरीय र पहुँचयोग्य स्वास्थ्य सेवा सुनिश्चित गर्न प्रतिबद्ध छौं। यो सम्झौताले गाउँपालिकावासीको स्वास्थ्य उपचारमा ठूलो सहजता ल्याउनेछ।”
नागरिकको प्रत्यक्ष लाभमा केन्द्रित पहल
यो सम्झौता जगरनाथपुर गाउँपालिकाको स्वास्थ्य सेवा पहुँच विस्तारतर्फको प्रयासको एक महत्वपूर्ण पाटोका रूपमा लिइएको छ। स्थायीत्व, पहुँच, र सुलभता सुनिश्चित गर्दै जनतामुखी सेवा प्रवाह गर्ने उद्देश्यले गरिएको यो सहकार्य स्थानीय तह र निजी क्षेत्रबीचको सफल सहकार्यको उदाहरणका रूपमा समेत देखिएको छ।
