पर्सा — पर्सा जिल्लाको जीराभवानी गाउँपालिकाले आगामी आर्थिक वर्ष २०८२र८३ का लागि ३६ करोड रुपैयाँको अनुमानित बजेट प्रस्तुत गरेको छ।
आइतबार वडा नं। ३ को कार्यालयमा सम्पन्न १५औं गाउँसभामा उपाध्यक्ष रेखा चौधरीले नीति, कार्यक्रम र बजेट सार्वजनिक गर्दै गाउँपालिकाको विकासका लागि प्राथमिकताका क्षेत्रहरूबारे जानकारी दिइन्।
संघीय सहयोग र आन्तरिक स्रोत
उनका अनुसार बजेटको स्रोतमध्ये ९ करोड रुपैयाँ संघीय सरकारको वित्तीय समानीकरण अनुदानबाट, १८ करोड सशर्त अनुदानबाट, ८ करोड राजस्व बाँडफाँटमार्फत र १ करोड रुपैयाँ आन्तरिक आम्दानीबाट आउने अनुमान गरिएको छ।
शिक्षा र स्वास्थ्यलाई अगाडि
गाउँपालिकाले शिक्षा, स्वास्थ्य र कृषिलाई आगामी वर्षको नीति तथा कार्यक्रममा शीर्ष प्राथमिकता दिएको छ। दुईवटा माध्यमिक विद्यालयमा कक्षा १२ सम्मको पठनपाठनलाई निरन्तरता दिइने भएको छ भने, आगामी मंसिरभित्र १० शैयाको आधारभूत अस्पताल सञ्चालन गर्ने लक्ष्य लिइएको छ।
भौतिक पूर्वाधार र प्रशासनिक भवन
गाउँपालिकाको प्रशासनिक भवन फागुन महिनाभित्र सम्पन्न गर्ने योजना रहेको उपाध्यक्ष चौधरीले बताइन्। यसका साथै स्थानीय पूर्वाधारको स्तरोन्नतिमा पनि बजेट छुट्याइएको छ।
कृषिमा उत्पादनदेखि बजार व्यवस्थापनसम्म
कृषिमा आत्मनिर्भरता अभिवृद्धि गर्न बालीको उत्पादन, वितरण, भण्डारण र बजार व्यवस्थापनसम्मको नीति तय गरिएको छ। किसानहरूलाई मल, बीउ, कीटनाशक औषधि सहज रुपमा उपलब्ध गराउने र उत्पादनको उचित मूल्य सुनिश्चित गर्ने नीति पनि बजेटमा समावेश गरिएको छ।
सिँचाइमा आत्मनिर्भरता
प्रमुख प्रशासकीय अधिकृत राज कुशवाहाका अनुसार प्रदेश सरकारसँग ५ करोड रुपैयाँको सहयोग माग गरी कृषि विद्युतीकरण तथा सिँचाइ प्रणाली विस्तार गरिनेछ। खडेरीका कारण समस्यामा परेका किसानका लागि नदी, खोलामा समेत सिँचाइ आयोजना सुरु गरिने छ।
