बारा — जीतपुरसिमरा उपमहानगरपालिकाले म्याद सकिएको सडकको शिलान्यास गरिएको घटना अहिले समाजिक सञ्जालमा भाइरल भएको छ।
संघीय सरकारको ५० लाख रुपैयाँ बजेटमा २८ लाखमा ठेक्का पाएको ए.भी.सी. कन्स्ट्रक्सन एण्ड बिल्डर्स प्रा.लि.ले २०७८ बैशाख १२ गते सम्झौता गरी २०८२ जेठ २८ गतेभित्र काम सम्पन्न गर्ने गरी काम लिएको थियो। तर, काम सम्पन्न गर्ने म्याद सकिएको तीन दिनपछि, जेठ ३१ गते शनिबार, बारा क्षेत्र नम्बर ३ का माननीय सांसद ज्वाला साहले धुमधामसहित शिलान्यास गरे।
योजना बोर्डमै स्पष्ट रूपमा “सम्पन्न हुने मिति: २०८२ जेठ २८” उल्लेख हुँदा पनि त्यसपछि शिलान्यास गरिनु शिलान्यास मोहको पराकाष्ठा हो भन्ने टिप्पणीहरू व्यापक रूपमा फैलिएका छन्।
सम्झौताअनुसारको कार्यसम्पादन म्याद नहेरी, जनताको आँखामा धुलो हाल्ने शैलीमा शिलान्यास कार्यक्रम गर्नुले सांसद साहको नियतमै प्रश्न उठेको छ। सामाजिक सञ्जाल प्रयोगकर्ताहरूले लेखेका छन् — “पहिले काम सकियोस्, पछि उद्घाटन होस्। म्यादपछिको शिलान्यास भनेको के हो ?”
सामान्यतया काम सुरु हुनुअघि शिलान्यास गरिने प्रचलन भए पनि, यस घटनाले देखाएको छ — राजनीतिमा ‘फोटो खिचाइ’ र ‘श्रेय लिने’ होड अझै कायम छ। साभार पिएस खबर
