काठमाडौं –
रौतहटको फतुवा विजयपुर नगरपालिकामा कृषि उपकरण खरिदको नाममा भएको आर्थिक हिनामिनाका कारण तत्कालीन निमित्त प्रमुख प्रशासकीय अधिकृत शम्भु कुमार यादवसहित पाँच जनाविरुद्ध भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोगका अनुसार आर्थिक वर्ष २०७८/७९ मा कृषकलाई वितरण गरिने स्प्रे टंकीको खरिद प्रक्रियामा बोलपत्र आह्वानका नाममा झुटा पत्रिका र नक्कली बिल भरपाई प्रयोग गरी नगरपालिकाबाट गैरकानुनी भुक्तानी गरिएको प्रमाणित भएको छ।
झुटा सूचना, नक्कली दस्तावेज
नगरपालिकाले जनसवाल राष्ट्रिय दैनिक र तराई पोस्ट दैनिकमा सूचना प्रकाशित गरिएको भनेर कागजात पेश गरे पनि प्रेस काउन्सिलको पुष्टिकरणमा ती सूचना दुवै पत्रिकामा कहिल्यै प्रकाशित नभएको खुलासा भएको हो।
त्यसका आधारमा जनसवाल दैनिकलाई रु १,७२,८२५ र तराई पोष्टलाई रु ३९,४०० गरी जम्मा रु २,१२,२२५ को भुक्तानी दिइएको थियो। अनुसन्धान अनुसार उक्त रकम प्रतिवादीहरूले मिलेमतोमा गैरकानुनी लाभको रूपमा बुझेका छन्।
मुद्दा भोग्ने पाँच प्रतिवादी :
शम्भु कुमार यादव – तत्कालीन निमित्त प्रमुख प्रशासकीय अधिकृत
नविन कुमार यादव – तत्कालीन सह–लेखापाल
रामजी वगाले – जनसवाल राष्ट्रिय दैनिकका सम्पादक
रुपेन्द्र पटेल – तराई पोष्ट दैनिकका प्रकाशक
ओमप्रकाश यादव – तराई पोष्ट दैनिकका प्रतिनिधि
सरकारी कागजातमा हेरफेर, चेकमा केरमेट
जाँचका क्रममा भुक्तानीका लागि जारी गरिएको चेकमा नाम मेटिएको, नक्कली पत्रिका नगर अभिलेखमा राखिएको, र सरकारी कागजातहरूमा बदनियतपूर्वक हेरफेर गरिएको पुष्टि भएको अख्तियारले जनाएको छ।
विशेष अदालतमा मुद्दा
आयोगले भ्रष्टाचार निवारण ऐन, २०५९ अनुसार सबै प्रतिवादीमाथि कानुनी कारबाही माग गर्दै विशेष अदालत, काठमाडौंमा मुद्दा दायर गरेको जानकारी आयोगका प्रवक्ता राजेन्द्र कुमार पौडेलले दिएका छन्।
