पर्सा, बिरगंज — बिरगंजस्थित नर्सिङ स्कुल नजिकैको बाइपास रोडमा रहेको डिभाइडरमा ठोकिँदा एक भारतीय गाडी दुर्घटना भएको छ। दुर्घटनामा परी गाडीमा सवार यात्रुहरु गम्भीर घाइते भएका छन्।
दुर्घटना आइतबार दिउँसो भएको बताइएको छ । गाडी तीव्र गतिमा रहेको र नियन्त्रण गुमाउँदा डिभाइडरमा ठोकिएको प्रारम्भिक अनुसन्धानबाट थाहा भएको छ। दुर्घटनापछि गाडीमा सवार यात्रुहरुलाई तात्कालिक रूपमा उद्धार गरी उपचारका लागि बाराको परवानिपुर गाउँपालिका वडा नं ५ सानो नौतन स्थित एल एस न्युरो अस्पताल पुर्याइएको छ।
एल एस न्युरो अस्पतालका चिकित्सकहरूका अनुसार यात्रुहरुको अवस्था गम्भीर भए पनि हाल इमर्जेन्सीमा राखेर उपचार प्रक्रिया जारी रहेको जनाइएको छ। घाइतेको नाम र ठेगाना भने अहिलेसम्म सार्वजनिक गरिएको छैन।
स्थानीय प्रहरी र ट्राफिक टोली घटनास्थलमा पुगेर सुरक्षा र ट्राफिक व्यवस्थापन मिलाएका छन्। प्रहरीले गाडीको नम्बर, चालक र यात्रुहरूको विवरण सङ्कलन गर्दै दुर्घटनाको यथार्थ कारणबारे थप अनुसन्धान भइरहेको छ।
