पर्सा, जेठ २४ – सशस्त्र प्रहरी बल नेपाल, पर्साले भारतबाट अवैध तवरले नेपाल भित्र्याइएको ७,५०० गोटा प्रतिबन्धित कुखुराको चल्ला बरामद गरेको छ।
सशस्त्र प्रहरी बल पर्साबाट खटिएको टोलीले आज बिहान बहुदरमाई नगरपालिका–५ स्थित डकैला चोकमा छापा मार्दै तस्करीको प्रयासमा रहेका ३ वटा भारतीय नम्बर प्लेटका मोटरसाइकलमा लोड गरिएको ७५ कार्टन ब्रोइलर चल्ला नियन्त्रणमा लिएको हो।
सशस्त्र प्रहरी बल नेपाल पर्साका सूचना अधिकारी देवेंद्रबहादुर सिंहका अनुसार बरामद गरिएका प्रतिबन्धित ब्रोइलर चल्ला क्वारेन्टाइन कार्यालयका प्रतिनिधि, स्थानीय जनप्रतिनिधि र सञ्चारकर्मीको उपस्थितिमा नष्ट गरिएको छ।
यस किसिमको तस्करीले पशु स्वास्थ्य, स्थानीय पोल्ट्री व्यवसाय र खाद्य सुरक्षामा खतरा निम्त्याउने भएकाले सशस्त्र प्रहरी बलले कडाइका साथ निगरानी गरिरहेको जानकारी सिंहले दिनुभयो।
तस्करी कार्यमा प्रयोग गरिएका मोटरसाइकलहरूलाई आवश्यक कानूनी प्रक्रिया पुर्याएर वीरगञ्ज भन्सार कार्यालयमा बुझाउने तयारी भइरहेको पनि सशस्त्र प्रहरीले जनाएको छ।
सशस्त्र प्रहरीले सीमा क्षेत्रमा अवैध चल्ला तस्करीका गतिविधिहरू नियन्त्रण गर्न सक्रिय गस्ती, सूचना संकलन र स्थानीय समन्वयलाई अझ सशक्त बनाएको बताएको छ।
