वीरगञ्ज, असार २४ — ट्राफिक सप्ताह २०८२ अन्तर्गत तेस्रो दिन पनि वीरगञ्जमा विभिन्न जनचेतनामूलक कार्यक्रमहरू आयोजना गरी सडक सुरक्षाबारे सन्देश फैलाइएको छ। जिल्ला प्रहरी कार्यालय पर्सा र जिल्ला ट्राफिक प्रहरी कार्यालय पर्साको संयुक्त आयोजनामा भइरहेका कार्यक्रमहरू क्रमशः प्रभावकारी बन्दै गएका छन्।
कार्यक्रम अन्तर्गत वीरगञ्जको बसपार्कस्थित अस्थायी ट्राफिक प्रहरी पोस्टमा साप्ताहिक जेब्रा क्रसिङ, बाटो र सडक पेटी सचेतना कार्यक्रम आयोजना गरियो। कार्यक्रममा सवारी चालक र पैदल यात्रुहरूलाई ट्राफिक सचेतना पर्चा र पम्पलेट वितरण गरिएको थियो।
यस्तै, मिलन चोकमा गुननिधि खकुरेलको नेतृत्वमा सञ्चालन गरिएको जनचेतनामूलक कार्यक्रममार्फत सर्वसाधारणलाई सडक सुरक्षा र ट्राफिक नियमको पालना सम्बन्धी जानकारी प्रदान गरियो।
कार्यक्रमको समन्वय जिल्ला ट्राफिक प्रहरी कार्यालय पर्साका प्रमुख प्रहरी निरीक्षक लोकराज भट्टले गर्नुभएको थियो। उहाँको नेतृत्वमा गण्डक, बसपार्क लगायतका क्षेत्रहरूमा सचेतनामूलक स्टिकर टाँस्ने, ट्राफिक नियमसम्बन्धी व्यावहारिक ज्ञान दिने, र चालक–यात्रीसँग प्रत्यक्ष संवाद गर्ने कार्य गरिएको थियो।
प्रहरी निरीक्षक भट्टले जानकारी दिनुहुँदै भन्नुभयो, “ट्राफिक सप्ताहलाई सुरक्षित र अनुशासित सडक व्यवस्थापनतर्फ नागरिक सहभागिता बृद्धि गर्ने अवसरको रूपमा लिएको छ।”
उहाँका अनुसार आगामी दिनहरूमा वीरगञ्जका अन्य क्षेत्रमा पनि सडक सुरक्षा सचेतना अभियानहरू सञ्चालन गरिनेछन्। ट्राफिक प्रहरी कार्यालयले नागरिक र सरोकारवालाको सहकार्यमा सुरक्षित र व्यवस्थित यातायात प्रणाली निर्माणमा योगदान पुर्याउने लक्ष्य लिएको छ।
