जनकपुरधाम — मधेश प्रदेशका मुख्यमन्त्री सतिशकुमार सिंहले लैंगिकमैत्री तथा समावेशी उद्यम विकासका लागि प्रदेश सरकार प्रतिबद्ध रहेको बताएका छन्।
नेपाल उद्योग वाणिज्य महासंघ मधेश प्रदेशको प्रतिनिधिमण्डलसँग बुधबार भएको छलफलमा मुख्यमन्त्री सिंहले महिलाको आर्थिक सशक्तिकरणलाई प्राथमिकता दिनुपर्ने बताए।
> “महिलाको आर्थिक सशक्तिकरण बिना समावेशी विकास सम्भव हुँदैन। महिला तथा पछाडि पारिएका समुदायलाई उद्यममा सहभागी गराएर मात्र दिगो विकास सम्भव छ,”
— मुख्यमन्त्री सतिशकुमार सिंह
कार्यक्रममा महासंघ मधेश प्रदेशका अध्यक्ष अशोककुमार टेमानीको नेतृत्वमा गएको टोलीले ‘लैंगिकमैत्री तथा समावेशी उद्यम र व्यवसाय विकास’ सम्बन्धी स्थितिपत्र मुख्यमन्त्रीलाई बुझाएको थियो।
महासंघले प्रदेश सरकारलाई महिलाको उद्यमशीलता प्रवर्द्धनका लागि नीति सुधार, लगानीमैत्री वातावरणको निर्माण र सहुलियतपूर्ण पहुँचको सुनिश्चितता गर्न आग्रह गरेको छ।
मुख्यमन्त्री सिंहले यस विषयलाई गम्भीर रूपमा लिँदै महिला, दलित, आदिवासी/जनजाति, अल्पसंख्यक लगायत सबै समुदायको समान सहभागिता सुनिश्चित गर्ने नीतिहरू प्रदेश सरकारले अघि बढाउने विश्वास दिलाए।
