वीरगंज — वीरगंज महानगरपालिका वडा नं. १७ अन्तर्गत अलौंस्थित मुस्लिम समुदायको कब्रगाहमा करिब ५० लाख रुपैयाँ लागतमा निर्माण हुने वाउन्ड्रीवालको महानगर प्रमुख राजेशमान सिंहले शिलान्यास गर्नुभएको छ।
शिलान्यास कार्यक्रममा प्रमुख सिंहले वीरगंजको धार्मिक र जातीय विविधतालाई समेट्ने साझा सहरको परिकल्पना प्रस्तुत गर्दै, “कब्रगाहको संरचना निर्माण धार्मिक सम्मान र सामाजिक उत्तरदायित्वको संकेत हो, यो केवल भौतिक विकास होइन,” भनी स्पष्ट पार्नुभयो।
उहाँले विगतमा अतिक्रमण, फोहोर र असुरक्षाबाट प्रभावित रहेको कब्रगाह पर्खाल निर्माणपछि व्यवस्थित हुने विश्वास व्यक्त गर्दै महानगर धार्मिक सहिष्णुता र सामाजिक समावेशीतामा प्रतिबद्ध रहेको उल्लेख गर्नुभयो।
कार्यक्रममा योजना प्रमुख अवधेश कुश्वाहा, प्राविधिक सल्लाहकार प्रकाशमान अमात्य, इन्जिनियर प्रकाश अधिकारी लगायत स्थानीय मुस्लिम समुदायका अगुवा र नागरिकहरूको उल्लेखनीय उपस्थिति रहेको थियो।
स्थानिय बासिन्दाहरूले महानगरको पहललाई स्वागत गर्दै यसले धार्मिक संरचनाको संरक्षणसँगै सामाजिक एकता र सहकार्यलाई बलियो बनाउने विश्वास व्यक्त गरेका छन्।
