काठमाडौँ, ६ कार्तिक । जनता समाजवादी पार्टी नेपाल जसपा नेपाल पर्साका जिल्ला कार्यकारिणी सदस्य, विन्दवासिनी गाउँपालिका अध्यक्ष, र जगरनाथपुर गाउँपालिकाका इन्चार्ज रमेश साह तेलीले आज पार्टी परित्याग गर्दै अशोक राईको नेतृत्वमा रहेका जनता समाजवादी पार्टी ९जसपा० मा प्रवेश गर्नुभएको छ ।
तेलीले मङ्गलवार काठमाडौँमा नेपाल सरकारका खानेपानी मन्त्री तथा जसपाका उपमहासचिव प्रदीप यादव र पार्टी उपाध्यक्ष रणध्वज कन्दङ्वाको हाथबाट पार्टी सदस्यता ग्रहण गर्दै पार्टी प्रवेश गर्नुभएको हो ।
मन्त्री यादवले तेलीको आगमनलाई महत्त्वपूर्ण राजनीतिक परिवर्तनको संज्ञा दिँदै अबको राजनीतिक आवश्यकता वास्तविक सङ्घर्ष र मधेसको समर्पित नेतृत्व रहेको बताउँदै भन्नुभयो, “जुन जसपाले मात्र प्रदान गर्न सक्छ । रमेशजीको आगमनले हाम्रो पार्टीलाई थप सबल बनाउनेछ, ।”
उहाँले जसपा नेपालले पद र सत्ताका लागि बारम्बार सम्झौता गर्दै मधेसी जनताको भावनासँग खेलबाड गरेको आरोप पनि लगाउनुभयो । “जसपाले भने सधैँ इमानदार सङ्घर्ष गर्छ, र अबको सही राजनीतिक विकल्प यही हो । समृद्ध मधेस र सशक्त राष्ट्र निर्माणका लागि सबैलाई ढिला नगरी जसपामा सामेल हुन आग्रह गर्दछु । परिवर्तन र पहिचानको यात्रा यहीँबाट सुरु हुन्छ,” उहाँले थप्नुभयो ।
त्यसै गरी, जसपा प्रवेश गर्नुभएको रमेश साह तेलीले मधेस र जनताको हितको संरक्षण गर्ने जिम्मेवारीबाट जसपा नेपाल चुकेको कारण आफूले जसपा प्रवेश गरेको बताउनुभयो । तेलीले जसपा नेपालमा आबद्ध रहेका अन्य नेताहरूलाई सही समयमै निर्णय लिन आग्रह गर्दै भन्नुभयो, “अब सबैले जसपामा सामेल भई सही मार्गमा अघि बढ्नुपर्छ । म सधैँ जनताको सेवामा सक्रिय रहँदै विकास र समृद्धिका लागि काम गर्न प्रतिबद्ध छु ।”
जसपाका उपाध्यक्ष रणध्वज कन्दङ्वाले तेलीजस्तो समर्पित नेताको साथले जसपा थप मजबुत हुने विश्वास व्यक्त गर्नुभयो । त्यस्तै पार्टीका नेता तबरेज अहमदले रमेश साह तेलीको आगमनलाई ऐतिहासिक निर्णयको रूपमा व्याख्या गर्दै जसपाले मात्र मुलुकको स्थायी परिवर्तन र मधेसको समृद्धिको ग्यारेन्टी गर्न सक्षम रहेको दाबी गर्नुभयो ।
रमेश साह तेलीको जसपामा प्रवेशलाई पर्साको राजनीति र जसपाको अभियानमा नयाँ ऊर्जा थप्ने घटनाका रूपमा हेरिएको छ । जसपाले आगामी दिनहरूमा मधेसको अधिकार र पहिचानका लागि आफ्नो अभियानलाई अझ सशक्त बनाउन योजना बनाएको छ ।
