ढल्केबर, वैशाख १७ गते । धनुषाको छिरेश्वरनाथ नगरपालिकामा पानीका स्रोत सुकेपछि वारुणयन्त्रबाट पानी वितरण गर्न थालिएको छ । पछिल्लो समय यहाँ चापाकाल र अन्य पानीका स्रोत सुकेपछि वारुणयन्त्रबाट पानी वितरण गर्न थालिएको हो ।
नगरपालिकाका नगर प्रमुख सुखदेव यादवले नगरपालिकाको उत्तरी क्षेत्र दुर्गाटोल र दिगम्बरपुर गाउँमा पानी स्रोत सुकेको बताउनुभयो । ती दुवै गाउँमा रहेको चापाकल सुकेर पानी आउन बन्द भएको छ । चापाकलमा पानी आउन बन्द भएको गाउँका बासिन्दालाई विगत एक सातादेखि वारुणयन्त्रको मद्दतले खानेपानी उपलब्ध गराइरहेको उहाँले जानकारी दिनुभयो । नगरपालिकासँग खानेपानी ट्याङ्कर नभएकाले पानी वितरणका लागि वारुण यन्त्रलाई उपयोगमा ल्याइएको बताउँदै नगर प्रमुख यादवले साँझ, बिहान र आवश्यकता अनुसार पानी उपलब्ध गराइरहेको बताउनुभयो । उहाँले पानीको दीर्घकालीन समस्या समाधानसमेत जुटेको बताउनुभयो ।
उहाँले भन्नुभयो, “दुर्गाटोलस्थित महादेव मन्दिरनजिक बिग्रेको अवस्थामा रहेको डिप ट्युबेल सञ्चालन ल्याउन मर्मतसम्भारको काम भइरहेको छ । त्यसलगायत सोही बस्तीमा २० लाख रुपियाँको लागतमा एक थान नयाँ डिप ट्युबेल र तीन वटा इनार खन्ने योजनामा काम भइरहेको छ ।”
त्यस्तै दिगम्बरपुरमा पनि खानेपानीको समस्या समाधान गर्न त्यहाँ रहेको खानेपानी योजना सञ्चालनमा ल्याउने काम भइरहेको नगर प्रमुख यादवको भनाइ छ । दिगम्बरपुरमा पनि २० लाख रुपियाँको लागतमा नयाँ डिप ट्युबेल र चार वटा नयाँ इनार खन्न बजेट विनियोजन गरिएको उहाँले बताउनुभयो ।
स्थानीय सितेशकुमार झाले जमिनमुनि पानीको जलस्तर तल हुँदै गएकाले पानीका स्रोत सुकेको बताउनुभयो । उहाँले विगत केही वर्षदेखि सुक्खायाम सुरु भएसँगै यस क्षेत्रमा पानी स्रोत सुक्ने गरेको बताउँदै पानीको दीर्घकालीन उपायमा जुट्न यस क्षेत्रबाट निर्वाचित स्थानीय जनप्रतिनिधि, प्रदेश सभा सदस्य र प्रतिनिधि सभा सदस्यलाई आग्रह गर्नुभयो ।
धनुषाको उत्तरी क्षेत्र छिरेश्वरनाथ, बटेश्वर, मिथिला, धनुषाधाम र गणेशमान चारनाथ नगरपालिकामा नदी, पानी खोल्सी, जरुवा, इनार र चापाकललगायतका पानीका स्रोत सुक्न थालेपछि पानीको सङ्कट बढ्न थालेको स्थानीयको भनाइ छ । सभार गोरखापत्र अनलाइन
