वीरगञ्ज । वीरगञ्ज उद्योग वाणिज्य संघको आयोजनामा होली मिलन समारोह सम्पन्न भएको छ । बिर्तास्थित वीरगञ्ज उद्योग वाणिज्य संघको हरिप्रसाद गिरी सभाहलमा होली मिलन समारोह सम्पन्न भएको हो ।
नेपालीहरुको महान पर्व फागू पूर्णिमा तथा होलीको अवसरमा शुभकामना साटासाट गर्ने तथा भाइचारा र आत्मियताको विकास गर्ने अभिप्रायले कार्यक्रमको आयोजना गरिएको संघका अध्यक्ष अनिल कुमार अग्रवालले बताए ।
होली मिलन समारोहमा चितवनको क्षेत्र नम्बर १ बाट निर्वाचित राष्ट्रिय स्वतन्त्र पार्टी (रास्वपा) का प्रतिनीधि सभा सदस्य हरि ढकाल, नेपाल उद्योग वाणिज्य महासंघका केन्द्रीय सदस्य डा. सुवोध कुमार गुप्ता, नेपाल उद्योग वाणिज्य महासंघ मधेश प्रदेशका अध्यक्ष अशोक टेमानी, निवर्तमान अध्यक्ष गणेशप्रसाद लाठ, उद्योगी व्यवसायी, राजनीतिकर्मी, सञ्चारकर्मी लगायतको उपस्थिती रहेको वीरगञ्ज उद्योग वाणिज्य संघका बरिष्ठ उपाध्यक्ष हरि गौतमले जानकारी दिए ।
चाडवाडमा जमघट हुँदा एकअर्कामा शुभकामना साटासाटसँगै सुखदुःख तथा भलाकुसारी हुने हुँदा हरेक वर्ष होली मिलन समारोहको आयोजना गर्दै आएको संघका उपाध्यक्ष माधव राजपालले बताए ।
