वीरगञ्ज । करिब डेढ सय वर्षदेखि लाग्दै आएको बहुदरामाईको मेला यसपालि पनि धुमधामका साथ लागेको छ । कार्तिक पूर्णिमा (सोमबार) देखि पाँच दिने बुहदरामाई मेला पर्साको बहुदरामाई नगरपालिका वडा नम्बर २ ध्यानसिंह पिपरामा लागेको छ ।
पर्सामा थुप्रै मेला लागे पनि यसको आफ्नो छुट्टै पहिचान एवम विशेषता छ । शुरूमा तिलावे खोलाको पश्चिम किनारमा गाईवस्तुको लागि चरण क्षेत्र (रखाँत) थियो । सोही रेखातमा एउटा सर्प निस्कियो ।
उक्त सर्पको पूजापाठ गर्दै गएपछि पिपरा गाउँवासीको रक्षा हुन थालेकाले गाउँलेवासीहरु बहुदरामाईको मन्दिर निर्माण गरी पूजापाठका साथै मेला लगाउन शुरू गरेको गाउँका बूढापाकाहरूले बताउँछन् ।
गाउँँवासीहरुले नदीको पश्चिम किनारमा पहिले एउटा पीपलको रूख नजीकै खपडाको घरमा मन्दिर सञ्चालनमा ल्याए । र सोही बहुदरामाईको नामले प्रत्येक वर्षको कात्र्तिक पुर्णिमामा ५ दिनको लागी मेला लाग्न थालेको छ । वि.स. २०५२–५३ सालमा आएको भीषम बाढीले उक्त पीपलको रूख र मन्दिर बगाएको थियो ।
त्यसपछि त्यहाँ नयाँ र आर्कषक मन्दिर निर्माण भई बहुदरामाईको पूजापाठ र मेला लाग्ने गरेको छ ।
२०७४ सालमा देश सङ्घीयतामा गएपछि उक्त धार्मिकस्थलबाट बहुदरमाई नगरपालिकाको नाम नमाकरण भएको एमाले नेता शिव पटेल बताउँछन् । नेता पटेलका अनुसार सोमबार (हिजो) मेला प्रारम्भ भएको हजारौं श्रद्धालु भक्तजनहरुले मन्दिर नजिकको तिलावे नदीमा स्नान गरी दियो बालेर पूजापाठ गरेका छन् ।
करीब १० बिघा क्षेत्रफलमा लगेको मेलामा एक हजारभन्दा बढी पसल र खाने परिकारका स्टलहरुका स्टल लागेको मेला व्यस्थापन समितिका अध्यक्ष युगलप्रसाद कुर्मीले बताए । मेलामा मिठाइ, माछामासु, तास, सेकुवा लगायतको खानेकुराको स्टल लगाइएको उनले बताए ।
ग्रामीण भेगमा कार्तिक महीनाभर माछामासु खान वर्जित छ । कार्तिक पूर्णिमापछि सबैले मांसहारी खाएर रमाउन पाउने भएकाले बहुदरामाई मेला सबैको रोजाईमा पर्ने गरेको छ ।
मेलामा हरेक वर्षझै यस वर्ष पनि मिठाइका परिकारभन्दा तारेका अन्डा, माछा, मासुका परिकारहरू खानेहरूको भीड बढी देखिएको छ ।
पाँच दिने बहुदराई नगरपालिकामा मंगलबार (आज) भोलिदेखि चार दिनसम्म दिउँसो कुश्ती र राति ८ देखि २ बजेसम्म नाच हुने मेला समितिले जनाएको छ । कुश्तीमा दैनिक पाँच हजारभन्दा बढी र नाचमा तीन हजारभन्दा बढी दर्शकको उपस्थिति हुने समितिका अध्यक्ष कुर्मीको अड्कल छ । नाच र कुश्तीका पात्र प्रत्येक दिन फरकफरक हुने मेला व्यवस्थापन समितिका अध्यक्ष कुर्मीले बताए । सभार : इस्नेश
