वीरगञ्ज । नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले जाजरकोट र रुकुम पश्चिमका भूकम्प प्रभावितको राहत र उद्धारका लागि सम्पूर्ण शक्ति प्रयोग गर्न सरकारलाई आग्रह गर्नुभएको छ ।
नेपाल कम्युनिष्ट पार्टी एमाले मधेश प्रदेश कमिटीको आज वीरगन्जमा आयोजित सपथ ग्रहण समारोहमा अध्यक्ष ओलीले शुक्रबार राति विनाशकारी भूकम्पमा परी जाजरकोट र रुकुम पश्चिममा सयौँ सर्वसाधारणको ज्यान गएको र सयौँ घाइते भएको हुँदा पीडितको उद्धार र राहतका लागि सरकारले गर्ने सम्पूर्ण कार्यमा एमालेको पूर्ण साथ र सहयोग रहने बताउनुभयो ।
अध्यक्ष ओलीले पीडितहरूलाई राहत र उद्धारमा सहयोग गर्न पार्टी कार्यकर्ताहरूलाई निर्देशन समेत दिनुभएको छ ।
कार्यक्रममा नेकपा एमालेका सचिव एवं मधेश प्रदेश विभाग इन्चार्ज योगेश भट्टराइले मधेशमा बाढी, डुबान हुँदा पहाडले सहयोग गरेको बताउँदै पहाडमा पीडा हुँदा मधेशले पुर्याएको सहयोग अतुलनीय रहेको तथा जाजरकोट र रुकुम पश्चिममा सहयोग गर्न मधेश प्रदेश कमिटीले आर्थिक अभियान चलाइसकेको बताउनुभयो ।
