पुनमदेवीको हत्या गरेको आरोपमा इमरान मियाँ पक्राउ

वीरगञ्ज । वीरगञ्जको छपकैयामा गत शुक्रवार मृत भेटिएकी ब्युटिसियन पुनमदेवी सर्राफको हत्यामा संलग्न रहेको आरोपमा प्रहरीले एक युवकलाई पक्राउ गरी सार्वजनिक गरेको छ ।

जिल्ला प्रहरी कार्यालय पर्साले आइतबार पत्रकार सम्मेलन गरी पुनमदेवीको हत्यामा संलग्न रहेको आरोपमा पक्राउ परेका वीरगञ्ज महानगरपालिका – १ छपकैया निवासी २५ वर्षीय इमरान मियाँलाई सार्वजनिक गरेको हो ।

वीरगञ्ज – १ छपकैयाकै गगनदेव साहकी पत्नी ४० वर्षीय पुनमदेवी सर्राफ गत शुक्रवार बिहान आफ्नै घरभित्र रक्ताम्मे अवस्थामा अचेत फेला परेकी थिइन् । उपचारका क्रममा उनको सोही दिन मृत्यु भएको थियो ।

पक्राउ परेका इमरानले पुनमदेवीको हत्या आफैँले गरेको स्वीकार समेत गरेको पत्रकार सम्मेलनमा पर्सा प्रहरीका प्रमुख एवम् प्रहरी उपरीक्षक (एसपी) कोमल शाहले बताए । इमरान लागू पदार्थको दुर्व्यसनीसमेत रहेको अनुसन्धानका क्रममा खुलेको एसपी शाहले जानकारी दिए ।

एसपी शाहका अनुसार गत शुक्रवार बिहान ३ बजेतिर चोरी गर्ने उद्देश्यका साथ पुनमदेवीको घरको झ्यालबाट छतमा चढेर सिँढीघर हुँदै उनी सुत्ने कोठाभित्र पसेका थिए । घरमा एक्लै रहेकी पुनमदेवी उठेर जिउतिया पर्वको तयारीमा लागेकै बेला इमरानसँग उनको जम्काभेट भएपछि दुवै जना बिच घम्साघम्सी समेत भएको थियो । त्यस क्रममा इमरानले फलामको मोटो रडले पुनमदेवीको टाउकोमा चार पटक हानेर रक्ताम्मे बनाए । पुनमदेवी बेहोस भएपछि उनी घरको मूल ढोकाबाट बाहिर निस्किएर ढोकामा बाहिरबाटै चुकुल लगाएर भागे ।

बिहान साढे ३ बजेतिर जिउतीया पर्वका लागि पुनमदेवीकी दिदी उनको घरमा पुग्दा सुत्ने ओछ्यानमा उनी रक्ताम्मे भई अचेत अवस्थामा फेला परेपछि छिमेकीलाई खबर गरेकी थिइन् । सुरुमा उनलाई उपचारका लागि नारायणी अस्पताल लगिए पनि थप उपचारका नेशनल मेडिकल कलेजमा भर्ना गरिएको थियो। यद्यपि त्यहाँ चिकित्सकहरूले उनलाई मृत घोषित गरेका थिए ।

घटनाको अनुसन्धानका क्रममा प्रहरीले शनिवार मृतक पुनमदेवीले ब्युटी पार्लर सञ्चालन गरेको घरधनीका छोरालाई नियन्त्रणमा लिएर सोधपुछ समेत गरेको थियो । यद्यपि हत्यामा उनको संलग्नता नदेखिएपछि रिहा गरिएको एसपी शाहले पत्रकार सम्मेलनमा जानकारी दिए ।

पक्राउ परेका इमरानलाई भने पर्सा जिल्ला अदालतबाट म्याद थप गरी थप अनुसन्धान कार्य भइरहेको शाहले बताए ।