वीरगञ्ज । वीरगञ्ज महानगरपालिकाले आउँदै गएको दसैँ, तिहार र छठ पर्वलाई लक्षित गरी बजार अनुगमन कार्यलाई तीव्र पार्ने भएको छ ।
महानगरपालिका कार्यालयअन्तर्गतको बजार व्यवस्थापन तथा अनुगमन समितिको बुधवार बसेको बैठकले चाडपर्वका बेला बजार तथा पसलमा व्यापारीले कृत्रिम अभाव सृजना गर्ने तथा कालोबजारी गर्ने सम्भावना बढी हुने भएकाले त्यसलाई रोक्न बजार अनुगमनलाई अझ प्रभावकारी र तीव्र पार्ने निर्णय गरेको हो ।
उपमेयर समेत रहेका समितिका संयोजक इम्तियाज आलमको संयोजकत्वमा बसेको बैठकले बजार अनुगमन प्रभावकारी बनाउँदै कालोबजारी गर्ने, कृत्रिम अभाव सृजना गर्ने र ग्राहकलाई ठग्ने पसल र फर्मका सञ्चालकलाई कानुनी कारबाहीको दायरामा ल्याउने निर्णय पनि गरेको छ ।
बैठकमा अनुगमन समितिका संयोजक एवम् उपमेयर आलमले दसैँ, तिहार, छठ लगायत चाडपर्वका समयमा बजारमा उपभोक्ता ठगिने सम्भावना बढी हुने भएकाले बजार अनुगमनलाई थप प्रभावकारी बनाउनुपर्नेमा जोड दिए ।
बैठकमा महानगरपालिकाका प्रमुख प्रशासकीय अधिकृत लक्ष्मी प्रसाद पौडेल, उपमेयरका निजी सचिव रबिनन्दन सिंह, कार्यपालिका सदस्य कन्हैया ठाकुर, प्रहरी निरीक्षक पुष्कर बोगटी, ट्राफिक प्रहरी निरीक्षक भास्कर खतिवडा, सशस्त्र प्रहरीका प्रतिनिधि कमलेश पुरी, होटेल तथा पर्यटन व्यवसायी सङ्घका अध्यक्ष हरि पन्त, वीरगञ्ज उद्योग वाणिज्य सङ्घका सुरेश कुमार रुङ्गटा, खाद्य अधिकृत विपिन कुमार, उपभोक्ता अधिकारकर्मी अजित भुजेल, पत्रकार राहुल गुप्ताको लगायतको सहभागिता रहेको थियो ।
