वीरगञ्ज — ६४औँ इन्जिनियर्स डेका अवसरमा नेपाल इन्जिनियर्स एसोसिएसन ९एनईए० वीरगञ्ज केन्द्रले नेशनल मेडिकल कलेज, वीरगञ्जको प्राविधिक सहयोगमा मानसिक स्वास्थ्यसम्बन्धी सचेतना कार्यक्रम आयोजना गरेको छ। कार्यक्रम पर्साको वीरगञ्ज–१४ स्थित बीआईटी इन्जिनियरिङ कलेजमा सम्पन्न भएको हो।
कार्यक्रमको अध्यक्षता नेपाल इन्जिनियर्स एसोसिएसन वीरगञ्ज केन्द्रका अध्यक्ष इन्जिनियर प्रियांशु कुमार गुप्ताले गरेका थिए। एसोसिएसनका कोषाध्यक्ष इन्जिनियर इकबाल हुसेनको समन्वयमा आयोजित कार्यक्रममा इन्जिनियरिङका विद्यार्थी, प्राध्यापक, पेसाकर्मी तथा एसोसिएसनका सदस्यहरूको उल्लेखनीय सहभागिता रहेको थियो।
नेशनल मेडिकल कलेजका क्लिनिकल साइकोलोजिस्ट सन्देश सावन्तले मानसिक स्वास्थ्यको महत्त्व, तनाव व्यवस्थापन, भावनात्मक सन्तुलन, कार्य–जीवन सन्तुलन, मानसिक लचकता तथा आवश्यकता पर्दा समयमै मनोवैज्ञानिक परामर्श लिनुपर्ने विषयमा प्रस्तुति दिएका थिए। प्रस्तुतीपछि सहभागीहरूसँग अन्तरक्रियात्मक छलफलसमेत गरिएको थियो।
कार्यक्रममा सहभागीहरूले मानसिक स्वास्थ्यसँग सम्बन्धित विभिन्न जिज्ञासा राखेका थिए। उनीहरूले व्यक्तिगत तथा व्यावसायिक जीवनमा मानसिक स्वास्थ्यको महत्त्वबारे उपयोगी जानकारी प्राप्त गरेको आयोजकले जनाएको छ।
नेशनल मेडिकल कलेजले यस्ता स्वास्थ्य प्रवर्द्धन तथा समुदायमुखी कार्यक्रममार्फत मानसिक स्वास्थ्यसम्बन्धी सचेतना अभिवृद्धि गर्दै सामाजिक उत्तरदायित्व निर्वाह गर्दै आएको जनाएको छ।
