वीरगञ्ज — पर्साको जगरनाथपुर गाउँपालिकाबाट प्रहरीले २१३ केजी गाँजासहित एक ट्याक्टर नियन्त्रणमा लिएको छ। ट्याक्टरका चालक तथा संलग्न तस्करहरू भने फरार भएका छन्।
सोमबार राति विशेष सूचनाका आधारमा इलाका प्रहरी कार्यालय पटेर्वा सुगौलीबाट प्रहरी निरीक्षक समुन्नत अधिकारीको नेतृत्वमा खटिएको टोलीले जगरनाथपुर गाउँपालिका–४ बाट मे १ त ५७१४ नम्बरको ट्याक्टरसहित ठूलो परिमाणमा गाँजा बरामद गरेको हो।
प्रहरीका अनुसार पटेर्वा सुगौली गाउँपालिका–१ सोनवर्षाबाट गाँजा लोड गरेर भारततर्फ लैजाँदै गरेको ट्याक्टरलाई प्रहरी टोलीले सोनवर्षाबाटै पछ्याएको थियो। जगरनाथपुर गाउँपालिका–४ पुग्नेबित्तिकै चालक र तस्करहरू गाँजासहितको ट्याक्टर छाडेर फरार भएको प्रहरी निरीक्षक अधिकारीले जानकारी दिए।
ट्याक्टर धनी तथा संलग्न तस्करहरू सोनवर्षा गाउँका रहेको प्रारम्भिक जानकारी भए पनि उनीहरूको पहिचान खुलाइएको छैन। बरामद गाँजा र ट्याक्टर इलाका प्रहरी कार्यालय पटेर्वा सुगौलीमा राखिएको प्रहरीले जनाएको छ।
फरार रहेका चालक, ट्याक्टर धनी तथा तस्करहरूको खोजी कार्य भइरहेको प्रहरीले बताएको छ।
