वीरगन्ज। विभिन्न महत्वपूर्ण निर्णय गर्दै प्रेस सेन्टर पर्साको बैठक सम्पन्न भएको छ। प्रेस सेन्टरको स्थापना दिवसको अवसरमा माघ १५ गते वीरगंजमा प्रभातफेरी, रक्तदान कार्यक्रम तथा प्रतिनिधिसभा उम्मेदवारहरूसँग अन्तरक्रिया कार्यक्रम आयोजना गर्ने निर्णय बैठकले गरेको छ। उक्त जानकारी प्रेस सेन्टर पर्साका अध्यक्ष शिवनाथ यादवले दिए।
अध्यक्ष यादवको अध्यक्षतामा सम्पन्न बैठकमा प्रेस सेन्टर मधेश प्रदेशका अध्यक्ष निरज पिठाकोटे मगरले संगठनको नीति तथा नियमबारे स्पष्ट पारे। यस्तै नेपाल पत्रकार महासंघ पर्सा शाखाका अध्यक्ष ओमप्रकाश खनालले पत्रकार आचारसंहिता तथा निर्वाचन आचारसंहिताको पालना गर्नुपर्ने विषयमा जोड दिए।
बैठकमा प्रेस सेन्टरका केन्द्रीय सदस्य सन्तोष पौडेल, नेपाल पत्रकार महासंघ मधेश प्रदेशका सचिव तथा प्रेस सेन्टर पर्साका सल्लाहकार दीपक गौतम, जगत राईलगायत प्रेस सेन्टर पर्साका सदस्यहरूको उपस्थिति रहेको थियो।
बैठकको सञ्चालन प्रेस सेन्टर पर्साका सचिव अजित भुजेलले गरेका थिए।
