वीरगन्ज – वीरगन्ज महानगरपालिका–६ स्थित बहुअरीको वीरगन्ज हेल्थ केयर (BHC) अस्पतालमा जटिल अवस्थाको गर्भबाट आमा र शिशुको सकुशल प्रसूती गराएबापत अस्पतालका स्वास्थ्यकर्मीलाई सम्मान गरिएको छ।
आमा अन्नु मिश्राको ज्यान जोखिममा रहेको अवस्थामा सफल शल्यक्रिया मार्फत आमा र शिशु दुवैको ज्यान बचाएको भन्दै उनका पति राकेश मिश्राले अस्पतालकी प्रशासन प्रमुख तथा स्वास्थ्यकर्मी भूमिका अधिकारीलाई मायाको चिन्ह प्रदान गर्दै सम्मान गरेका हुन्।
भूमिका अधिकारीका अनुसार, गर्भवती अन्नु मिश्रालाई प्रसूती मिति आउन १० दिन बाँकी रहँदा स्वास्थ्य समस्या देखिएपछि गत आइतबार चेकजाँचका लागि अस्पताल ल्याइएको थियो। जाँचका क्रममा गर्भभित्रको शिशु सामान्यभन्दा कम चलिरहेको पाइएपछि तुरुन्तै भर्ना गरिएको थियो। त्यसपछि डा. रमोला साह, भूमिका अधिकारीसहितको चिकित्सक टोलीले आपतकालीन शल्यक्रियाको निर्णय लिएको थियो।
शल्यक्रिया निकै चुनौतीपूर्ण भए पनि सफल रूपमा सम्पन्न गरिएको अधिकारीले जानकारी दिइन्। आमा र शिशुलाई तीन दिनसम्म अस्पतालको निगरानीमा राखेर उपचार गरिएको र उनीहरूलाई सकुशल घर पठाइएको अस्पतालले जनाएको छ।
राकेश मिश्राले अस्पताल र चिकित्सक टोलीप्रति आभार प्रकट गर्दै भने, “जसरी मेरो पत्नी र नवजात शिशुको जीवन संकटमा थियो, त्यस अवस्थामा भूमिका अधिकारी र सम्पूर्ण टोलीले जुन समर्पण देखाएर जीवन रक्षा गर्नुभयो, त्यो सधैं स्मरणीय रहनेछ।”
वीरगन्ज हेल्थ केयरले जटिल प्रकृतिका स्वास्थ्य सेवामा समेत प्रभावकारी भूमिका खेलिरहेको पुष्टि गर्ने यो घटनाले आम नागरिकमा अस्पतालप्रतिको विश्वास अझै बलियो बनाएको छ।
