परवानीपुर —
विगत एक महिनादेखि पानीको चरम अभाव झेलिरहेका परवानीपुर गाउँपालिका–५ का स्थानीय जनता गाउँपालिका उपाध्यक्ष सुगन्धी देवी कनुइनको घरमा पानीको गुहार लिएर पुगेका थिए। तर, उनीहरू रित्तै हात फर्किन बाध्य भए।
स्थानीयको भनाइ अनुसार पालिकामा पटक–पटक गरी तीनवटा बोरिङ गाडिएको भए पनि पानी व्यवस्थापन असमान, असन्तुलित र अव्यवस्थित रहेको छ। एउटै गाउँभित्रको एकातर्फका बासिन्दालाई पानी सहज रूपमा उपलब्ध गराइएको छ भने अर्कोतर्फका जनता निरन्तर वञ्चित छन्। यही पीडाबाट आक्रोशित जनसमुदाय खाली बाल्टिनसहित उपाध्यक्षको घर पुगेका थिए।
पानी व्यवस्थापनको सवालमा पटकपटक गुनासो गर्दा पनि कुनै सुनुवाइ नभएको भन्दै स्थानीय बुद्धिजीवी, महिला, र युवाहरू समेत पानीका भाँडाकुँडा लिएर उपाध्यक्षको घरमा पुगेका हुन्। तर, जनताको समस्याप्रति कुनै चासो नदिएको भन्दै उनीहरू थप आक्रोशित बने।
यसैबीच, उनीहरूले वडा नम्बर ५ का वडाध्यक्षको घरमा समेत पुगेर समानुपातिक पानी वितरणको माग गरेका छन्। स्थानीयको अनुसार, यदी छिटो पानी समस्या समाधान नभएमा संयुक्त आन्दोलनमा उत्रिने चेतावनीसमेत दिइएको छ।
