वीरगञ्ज, असार २४ – “सेवा नै धर्म हो” भन्ने मूल उद्देश्यका साथ निरन्तर सामाजिक सेवामा सक्रिय वीरगञ्ज समाज सेवाद्वारा सञ्चालनमा रहेको नि:शुल्क भोजन शिविरले आफ्नो ५६ औं सप्ताह सफलतापूर्वक सम्पन्न गरेको छ।
प्रत्येक शनिबार नारायणी अस्पताल परिसरमा हुने यस सेवाबाट साप्ताहिक रूपमा करिब ५०० जनालाई नि:शुल्क भोजन गराउने व्यवस्था मिलाइएको छ। सेवाको निरन्तरता र प्रभावकारिताले वीरगञ्जमा सकारात्मक सामाजिक चेतना फैलाएको छ।
५६ औं सप्ताहको विशेष अवसरमा माहेश्वरी समाज वीरगञ्जका नवनिर्वाचित अध्यक्ष प्रकाश बाहेतीले वीरगञ्ज समाज सेवालाई १० बोरा कतर्नी चामल र २ बोरा दाल हस्तान्तरण गर्दै महत्वपूर्ण सहयोग प्रदान गर्नुभएको छ। बाहेती स्वयं भोजन स्थलमा पुगेर खाद्यान्न सामग्री हस्तान्तरण गर्नुका साथै समाजप्रतिको उत्तरदायित्वको उदाहरण प्रस्तुत गर्नुभएको छ।
हालै सम्पन्न माहेश्वरी समाज वीरगञ्जको निर्वाचनमा अध्यक्ष पदमा निर्वाचित भएका बाहेतीको चयनलाई समाजले स्वागत गर्दै उहाँको नेतृत्वमा सामाजिक विकासमा नयाँ गति प्राप्त हुने विश्वास व्यक्त गरेको छ। नेपाल माहेश्वरी परिषदले पनि उहाँलाई बधाई दिँदै समाजलाई नयाँ उचाइमा पुर्याउने अपेक्षा राखेको छ।
वीरगञ्ज समाज सेवा र सहयोगी संस्थाहरूको यस्तो साझा पहलले सामाजिक उत्तरदायित्वको उत्कृष्ट नमूना प्रस्तुत गर्दै वीरगञ्ज शहरमा सकारात्मक सन्देश फैलाएको छ।
