पर्सा। पर्सा–१ का सांसद हरि पन्तले प्रतिनिधि सभाको सपथ ग्रहण गर्न जानुअघि जेन्जी आन्दोलनका सहिद परिवारलाई भेटेका छन्।
सपथ ग्रहणका लागि काठमाडौं प्रस्थान गर्नुअघि सांसद पन्तले जेन्जी आन्दोलनका सहिद असाब आलम ठकुराइकी आमा नजला खातुन र भाइ मुराद आलम ठकुराइलाई सहिदकै घरमै पुगेर भेट गरेका हुन्।
भेटका क्रममा सांसद पन्तले सहिद परिवारका एक सदस्यलाई रोजगारीको व्यवस्था मिलाउन अब बन्ने सरकारसँग पहल गर्ने प्रतिबद्धता व्यक्त गरेका थिए। उनले जेन्जी आन्दोलनकै कारण देशमा परिवर्तन सम्भव भएको उल्लेख गर्दै आन्दोलनका सहिदहरूको बलिदानीको उच्च सम्मान गर्ने बताए।
सो अवसरमा सांसद पन्तले सहिद परिवारलाई दोसल्ला ओढाएर सम्मान पनि प्रकट गरेका थिए।
जेन्जी आन्दोलनका क्रममा भदौ २४ गते काठमाडौंको कोटेश्वरमा भएको घटनामा गोली लागेर असाब आलम ठकुराइको घटनास्थलमै मृत्यु भएको थियो। सहिद आलमको परिवारमा श्रीमती, बुबा–आमा र भाइहरू रहेका छन्।
