पर्सा — पर्सा निर्वाचन क्षेत्र नम्बर–२ का प्रतिनिधिसभा उम्मेदवार अजय चौरसिया ले पर्सागढी नगरपालिका वडा नम्बर ६ र ७ मा घरदैलो कार्यक्रम सम्पन्न गरेका छन्। प्रतिनिधिसभा निर्वाचनलाई लक्षित गर्दै सञ्चालन गरिएको उक्त कार्यक्रममा स्थानीय नागरिकहरूको उल्लेखनीय सहभागिता देखिएको थियो।
घरदैलोका क्रममा उम्मेदवार चौरसियाले टोल–टोलमा पुगेर स्थानीयवासीहरूसँग प्रत्यक्ष भेटघाट तथा संवाद गरेका थिए। भेटघाटका क्रममा स्थानीयले भोग्दै आएका समस्या, आवश्यकता, सुझाव र अपेक्षाहरू खुलेर राखेका थिए। सडक, शिक्षा, स्वास्थ्य सेवा, खानेपानी र रोजगारीका विषयमा नागरिकहरूले आफ्ना धारणा राख्दा चौरसियाले ती विषयलाई गम्भीरतापूर्वक सुन्दै समाधानको प्रतिबद्धता जनाएका थिए।
स्थानीयवासीहरूले उम्मेदवार चौरसियालाई आत्मीय रूपमा स्वागत गर्दै सकारात्मक प्रतिक्रिया दिएका थिए। कार्यक्रममा युवादेखि जेष्ठ नागरिक, महिला तथा विभिन्न पेशामा आबद्ध नागरिकहरूको उत्साहजनक उपस्थिति रहेको थियो। स्थानीयहरूको भनाइमा यसपटक जनताको कुरा सुन्ने, जनतामैत्री र पहुँचयोग्य नेतृत्वको आवश्यकता रहेको छ।
घरदैलो कार्यक्रमलाई सम्बोधन गर्दै उम्मेदवार चौरसियाले जनताको विश्वास र साथ नै आफ्नो चुनावी अभियानको मुख्य शक्ति भएको बताए।
उनले भने, “जनताको भरोसा र सुझावकै आधारमा मेरो राजनीतिक यात्रा अघि बढेको छ। विकास, शिक्षा, स्वास्थ्य र रोजगारी सिर्जना मेरो प्रमुख प्राथमिकता हो। निर्वाचित भए जनताको आवश्यकता अनुसार व्यवहारिक र दिगो विकासका काममा केन्द्रित हुनेछु।”
चौरसियाले स्थानीय तहमा शिक्षा र स्वास्थ्य सेवाको गुणस्तर सुधार, युवालाई स्वदेशमै रोजगारीको अवसर सिर्जना तथा आधारभूत पूर्वाधार विकासमा विशेष ध्यान दिने प्रतिबद्धता पनि व्यक्त गरे। उनले जनप्रतिनिधि भएपछि टोल–टोलका समस्या पहिचान गरी समाधानतर्फ सक्रिय रूपमा लाग्ने विश्वास दिलाए।
घरदैलो अभियानले पर्सागढी वडा ६ र ७ मा चुनावी माहोल थप सक्रिय बनाएको स्थानीयहरूको प्रतिक्रिया छ। उम्मेदवार र मतदाताबीचको प्रत्यक्ष संवादले आपसी विश्वास बढ्दै गएको देखिएको छ।
