वीरगन्ज । पर्सा क्षेत्र नम्बर–३ बाट नेकपा एमालेका प्रतिनिधिसभा सदस्य उम्मेदवार रुपेश कुमार पाण्डे ले आफू राजनीति लोकप्रियता कमाउन नभई जनताको सेवाका लागि आएको स्पष्ट गर्नुभएको छ। मतदातासँगको भेटघाट तथा प्रत्यक्ष संवादका क्रममा उहाँले विकास र सुधारलाई केन्द्रमा राख्दै आफ्ना स्पष्ट एजेन्डा सार्वजनिक गर्नुभएको हो।
उम्मेदवार पाण्डेले कृषि क्षेत्रको रूपान्तरणलाई पहिलो प्राथमिकतामा राख्दै साना किसानको उत्पादनको उचित मूल्य सुनिश्चित गर्ने, मलखाद तथा सिँचाइको सहज व्यवस्था मिलाउने र कृषि उपजको बजार व्यवस्थापन सुधार गर्ने प्रतिबद्धता जनाउनुभयो। उहाँका अनुसार कृषिमा आधारित अर्थतन्त्रलाई मजबुत बनाउने बिना समग्र विकास सम्भव छैन।
त्यस्तै, शिक्षा र स्वास्थ्य क्षेत्रको आधुनिकीकरणमा जोड दिँदै पाण्डेले प्रविधि र सीपमूलक कार्यक्रममार्फत शिक्षाको गुणस्तर वृद्धि गर्ने तथा स्वास्थ्य चौकीहरूको स्तरोन्नति गरी गुणस्तरीय स्वास्थ्य सेवा गाउँ–गाउँसम्म विस्तार गर्ने योजना प्रस्तुत गर्नुभयो।
युवा, महिला र जेष्ठ नागरिकलाई लक्षित एजेन्डा प्रस्तुत गर्दै उहाँले युवालाई नेपालमै सम्मानजनक रोजगारी र सीप विकासका अवसर सिर्जना गर्ने, महिलाको वास्तविक नेतृत्व तथा निर्णय प्रक्रियामा सहभागिता बढाउने र जेष्ठ नागरिकका लागि समुदाय–आधारित सहयोग तथा सम्मान सुनिश्चित गर्ने विषयलाई प्राथमिकतामा राखिएको बताउनुभयो।
सांसद निर्वाचित भए नियमित जन–प्रतिवेदन सार्वजनिक गर्दै प्रत्यक्ष जवाफदेहिता कायम गर्ने प्रतिबद्धता जनाउँदै पाण्डेले भन्नुभयो, “म नारा होइन, संरचना बनाउन चाहन्छु। म भीड होइन, भविष्यसँग उभिन चाहन्छु। यदि राजनीति सेवा हो भने, म त्यसलाई व्यवहारमै देखाउन चाहन्छु।”
