वीरगन्ज–२८ बगहीमा सोमबार पर्सा निर्वाचन क्षेत्र नम्बर २ का नेपाली कांग्रेसका उम्मेदवार अजय चौरसियालाई स्थानीय युवाहरूले भव्य स्वागत गर्दै समर्थन जनाएका छन्।
आउँदो फागुन २१ गते हुने निर्वाचनलाई लक्षित गर्दै आयोजित कार्यक्रममा चौरसियाको सहभागिताले बगही क्षेत्रमा राजनीतिक माहोल थप तातेको देखिएको छ।
कार्यक्रमका क्रममा युवाहरूले समाज परिवर्तनका लागि केवल ‘जेन्जी’ (Gen Z) उम्मेदवार मात्रै नभई स्पष्ट दृष्टिकोण र दीर्घकालीन भिजन बोकेको नेतृत्व आवश्यक रहेको बताएका छन्। उनीहरूले वर्तमान अवस्थामा समाजले खोजेको नेतृत्व उमेरले मात्रै नभई सोच, नीति र कार्यदिशाले पनि जेन्जी हुनुपर्नेमा जोड दिए।
कार्यक्रममा सहभागी युवाहरूले “भिजनबिनाको नेता स्वीकार्य हुँदैन”, “समाज परिवर्तनका लागि नयाँ सोच चाहिन्छ” जस्ता नाराहरू लगाउँदै राजनीतिक नेतृत्वप्रति सचेत सन्देश दिएका थिए। युवाहरूको नाराले आगामी निर्वाचनमा मतदाताको प्राथमिकता विकास, सुशासन र जवाफदेहितामा केन्द्रित हुँदै गएको संकेत गरेको सहभागीहरूको भनाइ छ।
उक्त अवसरमा कांग्रेस उम्मेदवार चौरसियाले युवाहरूको समर्थनप्रति आभार व्यक्त गर्दै युवा शक्ति नै राष्ट्र परिवर्तनको मूल आधार भएको बताए। उनले शिक्षा, रोजगारी, उद्यमशीलता र स्थानीय विकासमा युवाको सक्रिय सहभागिता सुनिश्चित गर्ने प्रतिबद्धता जनाए। “युवाको ऊर्जा र विचारलाई नीति निर्माणमा समेट्न सकियो भने मात्रै दिगो परिवर्तन सम्भव हुन्छ,” चौरसियाले भने।
स्थानीयस्तरमा युवाहरूको सक्रिय सहभागिता र राजनीतिक चेतनाको बढ्दो प्रभावले पर्सा–२ को निर्वाचन प्रतिस्पर्धालाई थप रोचक बनाएको छ। निर्वाचन नजिकिँदै जाँदा विभिन्न दलका उम्मेदवारहरू मतदातासँग प्रत्यक्ष संवादमा जुटिरहेका छन् भने विशेषतः युवाहरू निर्णायक भूमिकामा देखिन थालेका छन्।
