पर्सा ।
पर्सा निर्वाचन क्षेत्र नं. २ अन्तर्गत बीरगंज महानगरपालिका वडा नं. २४ को रामगढवा बहुवारी टोलमा राष्ट्रिय स्वतन्त्र पार्टी (रास्वपा) ले सञ्चालन गरेको घरदैलो कार्यक्रम उत्साहपूर्ण वातावरणमा सम्पन्न भएको छ।
प्रतिनिधिसभा निर्वाचनलाई लक्षित गरी आयोजना गरिएको कार्यक्रममा जेष्ठ नागरिकहरूले दोसल्ला, माला र टीका लगाइ विजयको अग्रिम शुभकामना व्यक्त गरेका थिए भने जेन्जी युवाको उल्लेख्य सहभागिता रहेको थियो।
घरदैलोका क्रममा स्थानीयवासीले यस क्षेत्रको समग्र विकासका लागि युवा नेतृत्व अपरिहार्य रहेको धारणा व्यक्त गरेका छन्। युवाको नेतृत्वले रोजगारीका अवसर सिर्जना गर्ने र समाजलाई समृद्धिको बाटोमा अघि बढाउने आशा जागेको स्थानीयको भनाइ थियो। “पुरानै नारा, पुरानै बाचा र पुरानै पार्टीलाई अब अलविदा,” भन्ने सन्देशसहित नयाँ नेतृत्वमार्फत विकासमा वास्तविक परिवर्तन आउने विश्वास व्यक्त गरिएको थियो।
कार्यक्रममा रास्वपाका प्रतिनिधिहरूले सुशासन, पारदर्शिता र व्यवहारिक विकासलाई पार्टीको मुख्य एजेन्डा रहेको बताए। विकासको नाममा दोहोरिँदै आएका आश्वासनभन्दा परिणाम देखिने कामलाई प्राथमिकतामा राखिने प्रतिबद्धता जनाउँदै नागरिकको विश्वास पुनःस्थापनाका लागि काम गर्ने धारणा राखिएको थियो।
