वीरगञ्ज — पर्सा क्षेत्र नम्बर २ बाट नेपाली काँग्रेसका उम्मेदवार अजय चौरसियाले सबैया साझेदारी वन उपभोक्ता समूहका नवनिर्वाचित अध्यक्ष लखनलाल साह कानुलाई सम्मान गरेका छन्।
सबैया साझेदारी वन उपभोक्ता समूहको २२औँ साधारण सभाबाट अध्यक्षमा निर्वाचित साहलाई चौरसियाले शुक्रबार वीरगञ्जस्थित आफ्नै निवासमा स्वागत तथा सम्मान गरेका हुन्।
सो अवसरमा चौरसिया र नवनिर्वाचित अध्यक्ष साहबीच आगामी निर्वाचनलाई केन्द्रमा राख्दै छलफलसमेत भएको थियो। खुट्टामा चोट लागेका कारण हाल स्वास्थ्य लाभ गरिरहेका चौरसियाले घरमै रहेर पर्सा क्षेत्र नम्बर २ का विभिन्न व्यक्तित्व, नेता तथा कार्यकर्तासँग निरन्तर भेटघाट तथा चुनावी रणनीतिबारे छलफल गरिरहेको क्षेत्रीय सचिव रञ्जितकुमार पटेलले जानकारी दिए।
उक्त भेटघाट, सम्मान तथा छलफल कार्यक्रममा सबैया साझेदारी वन उपभोक्ता समूहका अध्यक्ष लखनलाल साह कानुका साथै नेपाली काँग्रेसका नेता एवं मधेश प्रदेश सरकारका भूमि व्यवस्था, कृषि तथा सहकारी मन्त्री श्याम प्रसाद पटेलको समेत उपस्थिति रहेको थियो।
