मधेस प्रदेश सरकारलाई अस्थिरतामा धकेलेर फेरि संघीय संसदमा ठूलो भाग खोज्दै आउने नेताप्रति जनआक्रोश बढ्दै गएको छ। यही सन्दर्भमा बारा क्षेत्र नम्बर ४ मा राष्ट्रिय स्वतन्त्र पार्टी (रास्वपा) बाट उम्मेदवारी दिएका रहबर अंसारीप्रति स्थानीयस्तरमा गम्भीर प्रश्न उठ्न थालेका छन्।
२०७९ को निर्वाचनमा माओवादी केन्द्रबाट पर्सा जिल्लाबाट प्रदेशसभा सदस्यमा निर्वाचित भएका रहबर अंसारीले हाल माओवादी केन्द्रको केन्द्रीय सदस्य र प्रदेशसभा सदस्य दुबै पद त्याग्दै रास्वपा प्रवेश गरेका हुन्। लगत्तै उनले बारा क्षेत्र नम्बर ४ बाट प्रतिनिधिसभा सदस्यमा उम्मेदवारी दर्ता गराएका छन्।
तर बारा–४ का मतदाताहरूको मनमा एउटै प्रश्न छ— पर्साबाट निर्वाचित नेता किन बारा आएरु स्थानीयवासीहरूका अनुसार यदि अंसारी साँच्चै विकासप्रेमी नेता हुन् भने पर्सामा नै रहेर जनताको सेवा गर्नुपर्ने थियो। प्रदेशसभा सदस्य पद छाडेर संघीय संसदमा ठूलो भूमिका खोज्दै आउनु उनको राजनीतिक नियतमाथि प्रश्न उठाउने कारण बनेको छ।
युवामाझ चर्चामा रहेको ‘जेन्जी’ को नाममा भोट माग्दै मैदानमा उत्रिएका अंसारीको वास्तविक उद्देश्य के हो भन्ने विषयमा समेत चिया पसलदेखि चौतारासम्म बहस हुन थालेको छ। “मधेसको सरकार अस्थिर बनाउने अनि संघीय संसदमा अवसर खोज्ने प्रवृत्तिलाई यसपटक जनताले जवाफ दिनेछन्,” स्थानीय एक युवाले बताए।
स्थानीय स्तरमा बढ्दो प्रश्न र असन्तोषले बारा क्षेत्र नम्बर ४ को चुनावी माहोल थप तातिँदै गएको देखिन्छ।
