सामुदायिक विद्यालयको गुणस्तर सुधार्न अनुगमनमा कडाई गर्दै वीरगञ्ज महानगर, एकै दिन ९ जनासँग स्पष्टिकरण माग

वीरगञ्ज,२५ मंसिर ।
वीरगञ्ज महानगरपालिकाले सामुदायिक विद्यालयको शैक्षिक अवस्था सुधारका लागि अनुगमनलाई कडाई गरेको छ ।
संस्थागत विद्यालयको वर्गिकरण भर्खरै सकेको महानगरले आफू मातहतको सामुदायिक विद्यालयको शैक्षिक गुणस्तर बृद्धि गर्न अनुगमनलाई कडाई गर्न थालेको हो ।
महानगरको शिक्षा महाशाखाले सामुदायिक विद्यालयमा भइरहेको लापरवाही रोक्दै शैक्षिक गुणस्तर बृद्धि गर्न आइतबार मात्रै नगरको विभिन्न वडाका ५ वटा विद्यालयको अनुगमन गरेको छ ।
अनुगमनमा पुग्दा कुनै विद्यालयमा शिक्षक अनुपस्थित भएको, कुनैमा रजिष्टरमा देखाइएको भन्दा कम विद्यार्थी उपस्थित भएको र कुनै विद्यालयमा सरसफाईको कमी रहेको जस्ता समस्या फेला परेको महाशाखा प्रमुख अरविन्दलाल कर्णले बताए ।
वडा नम्वर १ छपकैयाँमा रहेको पण्डित रामदेव तिवारी आधारभुत विद्यालयबाट अनुगमनको सुरुवात गरेको टोलीले उक्त विद्यालयमा सरसफाईको कमी देखिएको भन्दै सरसफाईमा ध्यान दिन निर्देशन दिएको छ । आफैँ उपस्थित भएर सरसफाई गर्न लगाएको भन्दै कर्णले अबदेखि विद्यालयको कक्षाकोठा तथा विद्यालय हाता सफा राख्न र पठन पाठनमा विशेष ध्यान दिन भनेको बताए ।
वडा नम्वर २ को ताराचन किसनलाल आधारभुत विद्यालयमा अनुगमनका लागि पुग्दा ४ जना शिक्षक अनुपस्थित रहेकाले उनीहरुलाई स्पष्टिकरण माग गर्न प्रधानाध्यापकलाई निर्देशन दिएको पनि कर्णले जानकारी दिए ।
यस्तै वडा नम्वर १६ इनर्वाको बलराम आधारभुत विद्यालयमा भने रजिष्टरमा भएको हाजिरी र कक्षाकोठामा देखिएको विद्यार्थी संख्या मेल नखाएको भन्दै वास्तविक विद्यार्थी संख्या नदेखाएको भन्दै प्रधानाध्यापकलाई नै स्पष्टिकरण सोध्ने काम भएको पनि उनले बताए ।
सोही वडाको फुलबारी टोलमा रहेको सुक्रराज आधारभुत विद्यालय भने समय अगावै बन्द भएको पाइएको थियो । दिउँसो ४ बजेसम्म चल्नु पर्ने विद्यालय ३ बजे भन्दा अघि नै बन्द भएको पाइएकाले अनुगमन टोलीले विद्यालयका प्रधानाध्यापकलाई नै स्पष्टिकरण माग गरेको छ ।
यस्तै आजै वडा नम्वर १५ भेडियाहीको हरिहरसर्राफ चम्पादेवी आधारभुत विद्यालय पुगेको टोलीले त्यहाँ पनि शिक्षक अनुपस्थित रहेको भेट्टायो ।
२ जना शिक्षक अनुपस्थित रहेको र त्यस बारेमा प्रधानाध्यापकले पनि चित्तबुझ्दो जवाफ नदिएपछि शिक्षक सहित प्रधानाध्यापकलाई स्पष्टिकरण माग गरिएको छ ।
अनुगमनमा नभेटिएका शिक्षकको हाजिरी रोक्नुका साथै तलब कट्टा गर्न पनि प्रधानाध्यापकलाई निर्देशन दिएको शिक्षा महाशाखा प्रमुख कर्णले जानकारी दिए ।
सामुदायिक विद्यालयको पठन पाठन गुणस्तरीय बनाउन अनुगमनलाई निरन्तरता दिने र विना जानकारी विद्यालय नआउने शिक्षकलाई कारबाही गरिने उनले बताए ।
महानगरका मेयर राजेशमान सिंहले सामुदायिक विद्यालय सुधार आफूहरुको पहिलो प्राथमिकता रहेकाले लापरवाही गर्ने शिक्षकहरुलाई कारबाही गर्न निर्देशन दिए ।
विद्यालयमा चाहिने आवश्यक पूर्वाधार निर्माणमा आफूहरु लागि परेको भन्दै विद्यार्थीलाई पढाउन खटिएका शिक्षकले आफ्नो जिम्मेवारी पूरा गर्न आह्वान पनि गरे ।