पाँचथर — जिल्लामा शान्ति–सुरक्षा कायम गर्न तथा अवैध मदिरा नियन्त्रण अभियानलाई प्रभावकारी रूपमा कार्यान्वयन गर्न महत्वपूर्ण योगदान पुर्याएको भन्दै जिल्ला प्रहरी कार्यालय पाँचथरका प्रहरी नायब उपरीक्षक (डीएसपी) अनिश कुमार कर्ण सम्मानित हुनुभएको छ।
करदाता सेवा कार्यालय फिदिम, पाँचथरले कर प्रशासनका गतिविधि प्रभावकारी बनाउन प्रहरी प्रशासनबाट प्राप्त सहयोग, समन्वय र प्रतिबद्धताको उच्च मूल्याङ्कन गर्दै डीएसपी कर्णलाई प्रशंसापत्र प्रदान गरी सम्मान गरेको हो।
प्रशंसापत्र प्रदान कार्यक्रममा कार्यालयले शान्ति–सुरक्षा सुदृढीकरण तथा अवैध मदिरा नियन्त्रण अभियानमा प्रहरीको सक्रिय भूमिकाले कर प्रशासनका कार्यहरू सहज, पारदर्शी र प्रभावकारी बन्न सहयोग पुगेको उल्लेख गरेको छ।
करदाता सेवा कार्यालयका अनुसार प्रहरी प्रशासनसँगको सहकार्यले सरकारी नीति तथा कार्यक्रम कार्यान्वयनमा सकारात्मक प्रभाव परेको छ। आगामी दिनमा पनि यस्तै समन्वय र सहकार्य निरन्तर रहने विश्वास कार्यालयले व्यक्त गरेको छ।
