वीरगंज— वीरगंज महानगरपालिकामा आज खानेपानी संकट समाधानसम्बन्धी एक महत्वपूर्ण बैठक सम्पन्न भएको छ। नगरप्रमुख राजेशमान सिंहको अध्यक्षतामा आयोजित उक्त बैठकमा नेपाल खानेपानी संस्थानका पर्सा र बारा जिल्लाका प्रमुख, महानगरका अधिकारी, तथा विभिन्न सरोकारवाला निकायका प्रतिनिधिहरूको उपस्थिति रहेको थियो।
बैठकमा वीरगंजसहित तराई–मधेस क्षेत्रमा दिनप्रतिदिन चुलिँदै गएको पानी संकटको गम्भीर समीक्षा गर्दै दिगो समाधानका लागि आवश्यक रणनीति र योजनाहरूमा गहिरो छलफल गरिएको हो।
खानेपानी समस्या समाधानको उद्देश्यसहित, संघीय खानेपानी मन्त्री तथा पर्सा क्षेत्र नं. १० का प्रतिनिधिसभा सदस्य प्रदीप यादव स्वयं वीरगंजमा उपस्थित रहे। उनले जनताले भोगिरहेको चरम पानी अभावप्रति गहिरो चिन्ता र संवेदना प्रकट गर्दै समस्या समाधान गरेरै छाड्ने दृढ प्रतिबद्धता जाहेर गरे।
“खानेपानी संकट जलवायु परिवर्तन र खडेरीको असरसँग प्रत्यक्ष जोडिएको छ। यस्तो स्थितिमा सरकार जनताको आधारभूत आवश्यकताप्रति गम्भीर छ र कुनै कसर बाँकी राख्ने छैन।”
मन्त्री यादवले आफू स्थलगत अवलोकन र प्रत्यक्ष संवादका लागि वीरगंज आएको उल्लेख गर्दै, संघीय सरकार स्तरबाट समस्या समाधानका लागि तिव्र पहल जारी रहेको जानकारी दिए।
बैठकमा सहभागी सबै सरोकारवालाहरूले संकटको दीर्घकालीन समाधानका लागि समन्वयात्मक र संयुक्त प्रयास आवश्यक रहेकोमा जोड दिएका छन्।
स्थानीयवासीहरूद्वारा अत्यधिक चासोको विषय बनेको पानी अभाव समस्या अन्त्यतर्फ सरकारी तत्परताले केही आशा जागेको संकेत देखिएको छ।
