जनकपुरधाम । लोकतान्त्रिक समाजवादी पार्टी लोसपाका अध्यक्ष महन्थ ठाकुरले मधेश प्रदेश सरकार फेरिनुपर्ने बताएका छन्। उनले नेतृत्व परिवर्तन भएर सरकारसमेत पुनर्गठन हुनुपर्ने बताए।
बिहीबार जनकपुरधाम विमानस्थलमा पत्रकारहरूसँगको कुराकानीमा अध्यक्ष ठाकुरले गठबन्धनको मर्मअनुसार अन्य प्रदेशहरुमा सरकारको नेतृत्व परिवर्तन भएसरह नै मधेश प्रदेशमा समेत सरकारको नेतृत्व र स्वरूप परिमार्जन हुनुपर्ने बताए।
अध्यक्ष ठाकुरले मधेश प्रदेश सरकारको नेतृत्वमा लोसपाको समेत दाबी रहने बताए।
गठन्धनको मर्मअनुसार मधेश सरकारको नेतृत्वमा अव लोसपाकै पालो हुनुपर्ने अध्यक्ष ठाकुरको भनाइ छ।
उपनिर्वाचन अगाडिनै मधेश प्रदेशको सरकारका विषयमा दलहरुबीच सहमति भइसकेको भन्दै अध्यक्ष ठाकुरले त्यसैअनुसार मधेश सरकार परिवर्तन हुने जानकारी गराए।
अध्यक्ष ठाकुरले नक्कली भुटानी सर्नार्थी प्रकरणको छानविन भइरहेकाले सबैले सहयोग गर्नुपर्नेसमेत बताएका छन्। यो सरकार धेरै दिन टिक्दैन भन्ने हल्ला छ नि? भन्ने प्रश्नमा अध्यक्ष ठाकुरले आफू भविष्यवाणीकर्ता नभएको प्रतिक्रिया दिए।
